Megapolıs ákimi B.Saǵyntaevtyń habarlaýynsha, Memleket basshysynyń tapsyrmasyna sáıkes, qala turǵyndarynyń jumys orny men kiristerin saqtaý maqsatynda qala ekonomıkasynyń tómendeýin boldyrmaý boıynsha sharalar qabyldanǵan.
О́nerkásip, baılanys, qurylys salalarynda ekonomıkalyq ósim saqtalǵan. Mysaly, ónerkásip 4,3%-ǵa, qurylys 11,8%-ǵa, paıdalanýǵa beriletin baspana kólemi 3,6%-ǵa, baılanys qyzmetteri 8%-ǵa ósti.
2020 jyly megapolıstiń negizgi kapıtalyna 719,2 mlrd teńge ınvestısııalandy, onyń basym bóligi jeke ınvestorlardyń qarajaty. Investısııalardyń negizgi bóligi jyljymaıtyn múlikke tıesili (44,9%). Qalǵan bóligi kelesi salalar boıynsha bólindi: ónerkásip (13,8%); kólik jáne qattaý (9,6%); Densaýlyq saqtaý jáne áleýmettik sala (6,2%); sondaı-aq qarjy jáne saqtandyrý qyzmeti (6%).
Jyl qorytyndysy boıynsha Almatyda quny 176,2 mlrd teńge bolatyn 90 ınvestısııalyq joba iske asyrylyp, nátıjesinde 7,3 myń jańa jumys orny ashylady. Megapolıstiń negizgi kapıtalyna salynǵan ınvestısııalardyń jyldyq kólemi 900 mlrd teńgege baǵalanyp otyr.
2020 jyldyń 11 aıynyń qorytyndysy boıynsha memlekettik bıýdjetke jınalǵan salyqtar men tólemder ótken jyldyń uqsas kezeńine qaraǵanda 1%-ǵa kóp. Bul rette qalanyń memlekettik bıýdjet kiristerindegi úlesi 23,5-ten 25,7%-ǵa deıin ulǵaıdy.
«Daǵdarysqa qarsy sharalardy qabyldaý nátıjesinde qala ekonomıkasy turaqtandyryldy. Osylaısha, qala epıdemııadan keıingi kezde tez qalpyna keltirý áleýetin saqtaıdy», - dep atap ótti B.Saǵyntaev.
3 jeltoqsanda onlaın-formatta ótken ınvestısııalyq forýmnyń nátıjeleri boıynsha 1,5 trln teńge somasyna 55 memorandým jasaldy. Investorlardyń joǵary belsendiligi 2020 jylǵy syrtqy soqqylarǵa qaramastan, Almaty ınvestısııalyq belsendiliktiń halyqaralyq ortalyǵy bolyp qalatynyn rastaıdy.
