Almatylyq quqyq qorǵaýshylar taıaýda osyndaı bir shıkiliktiń shetin baıqap, jaýapkershiligi shekteýli seriktestiktiń bildeı bir dırektoryn asa iri kólemde alaıaqtyq jasady degen kúdikpen ustady. Polısııa departamenti málim etkendeı, kúdikti qarjylyq saýat arttyrý boıynsha semınarlar ótkizip, ózine ımandaı uıyǵan jurtty qarjy kózin paıdaly aksııalarda saqtaý kerek dep sendirgen. Qazirgi tańda onyń qylmystyq áreketinen zardap shekken 725 adam anyqtalyp otyr. Sonymen qoımaı ol bırjalyq saýdamen aınalysatyn jalǵan kompanııalar men saıttar ázirleýmen shuǵyldanypty.
– Kúdikti áıel mundaı áreketimen is júzinde uzaq ýaqyt aınalysqan adam retinde ádemi jáne saýatty sóılegendikten, kelýshiler oǵan sengen. Aldanǵan azamattarǵa ol aksıoner bolýdy jáne bırjalyq saýdalyq aktıvterge ınvestısııalaý arqyly aqshalaryn kóbeıtýdi usynǵan. Jospar boıynsha salymshylar salynǵan qarajattan 40% paıda alýy kerek bolatyn. Ideıany júzege asyrýǵa vırtýaldy platforma qajet bolǵan jáne ol úshin «ınvestorlarǵa» logın men parol berilip, elektrondy ámııan tirkelgen «itrade» saıty qoldanylǵan. Olar is júzinde ózderi salǵan qarajattyń jáne alynǵan kiristiń somasyn kórgenimen, bul tek monıtordaǵy sandar ǵana edi. Investısııa belsendi «qarjygerdiń» qaltasyna túsip otyrǵan, – deıdi Almaty qalalyq polısııa departamenti tergeý basqarmasy bastyǵynyń orynbasary Muhamedáli Seısenuly.
Tergeý barysynda azamattardyń ınvestısııa retinde 500-den 30 myń AQSh dollaryna deıin aqsha salǵany anyqtaldy. Salymshylardyń eshqaısysy ýáde etilgen somany ala almaǵan. Qarjylyq saýatty úıretip júrgen azamatsha bastapqyda alynǵan aqshany tóleýdi jáne qaıtarýdy josparlamapty da. Quzyrly orynnyń boljamynsha, onyń qylmystyq áreketinen 2019 jyldyń qańtarynan bastap jábirlenýshilerge jalpy somasy 180 myń dollardan astam materıaldyq shyǵyn kelgen.
«Is júzinde zardap shekken azamattardyń sany áldeqaıda kóp bolýy, kelgen shyǵyn mólsheri budan da joǵary bolýy múmkin. Kúdikti saıtta joǵary kiristi paıda tapqysy keletinderdi belsendi paıdalanǵan. Qazirgi tańda Qylmystyq kodekstiń 190-baby 4-bóliginiń 2-tarmaǵymen sotqa deıingi tergeý júrip jatyr. Buryn osyǵan uqsas qylmystary úshin qylmystyq jaýapkershilikke tartylǵan, 1974 jyly týǵan azamatsha Almaty qalasynyń ýaqytsha ustaý ızolıatoryna qamaldy», dep málimdedi tergeý basqarmasynyń ókilderi.
ALMATY
