Týrızm • 11 Jeltoqsan, 2020

Bozjyra qonaqúıi ıtalııalyq sarapshynyń nazaryn aýdartty

Qoǵam talqysyna túsken Bozjyra qonaqúıi sheteldik sarapshylardyń da nazaryn ózine aýdartty. Dál osy safarı-otel salý ıdeıasyn Rixos qonaqúı keshenin iske qosqan ınvestorlar usynǵan edi, dep habarlaıdy Egemen.kz

Aıym DÁÝIT

Italııanyń sáýlet jáne qala qurylysy salasyndaǵy áıgili sarapshysy, Urban Living konsaltıngtik kompanııanyń ókili Rıkardo Marını Mańǵystaý oblysyndaǵy Bozjyra shatqalyna baryp, aımaqtaǵy ekologııalyq týrızmdi damytý múmkindikteri jaıynda pikir bildirdi.

"Bul tamasha jer. Bul – tek jergilikti turǵyndar úshin ǵana emes, búkil álem týrısteri úshin jańa álem. Eger tabıǵat ásemdigi men adamdardyń ony kórý nıetiniń arasynda janjal týyndasa, tabıǵı ortaǵa qaýip tónýi múmkin. Sondyqtan bul qundylyqty saqtap, qorǵap qalý óte mańyzdy. Bul jaǵdaılar basshylyqtyń teris jolda ekenin bildiretin belgi. Adamdar ózderi qalaǵan jerinde júredi. Osy jerde júrip baıqaǵanym, plastık jáne shyny bótelkeler shashylyp jatyr", dedi R.Marını.

Sarapshy Bozjyra sııaqty tabıǵı resýrstardy saqtap qalýda ınfraqurylym, kommýnıkasııalar jáne bilim sııaqty ajyramas elementter retinde úılesimdiliktiń bolýyn tilge tıek etti.

"Eger qonaqúı resýrstary shatqaldy qorǵaý, aǵartý, jáne ol týraly habardar bolýǵa baǵyttalsa, eger ınvestorlar jobany qorshaǵan ortaǵa úlken qamqorlyq jasap iske asyrsa, eger maksımaldy túrde qaldyqsyz mehanızm bar bolsa, onda bul óte jaqsy ıdeıa. Shatqaldyń túbine jaıaý, atqa minip nemese elektromobılmen túsý kerek. Eger týrısterge tabıǵat aıasynda júrý tártibin, qoqys jınaý qajettiligin túsindiretin nusqaýlyqtar bolyp, olar durys qoldanylsa, búkil álemdegi tabıǵat eskertkishteri sııaqty, Bozjyra shatqalyn da turaqty damytýǵa bolady", dedi sarapshy.

Ol jaqsy oılastyrylǵan basqarýdyń sondaı-aq jergilikti jerdi mekendeıtin janýarlardyń joıylýyna jol bermeýge bolatynyna sendirip otyr.

"Eger ınfraqurylym jete damytylsa, janýarlar joıylmaıdy. Búkil álemde, Afrıkada, tipti Eýropada adamdarǵa álsiz ekojúıelerde júrýge múmkindik beretin kóptegen jerler bar. Munda kelýshiler tek jergilikti flora men faýnany qurmettese bolǵany. О́rmekshilerdi baspaı, baıqap júretin arnaıy mádenıet bolýy tıis", dedi ol.

Bozjyra shatqalynda safarı-qonaqúıdi salý ıdeıasyn qazirgi kezde qoǵamdyq belsendiler, jergilikti turǵyndar jáne ǵalymdarmen talqylanyp otyrǵanyn atap ótý kerek.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz