B. Saǵyntaevtyń aıtýynsha, ınjenerlik jeliler — qalanyń tynys-tirshiligin qamtamasyz etý júıesiniń kúre tamyry. Birer jyl buryn qalaǵa qosylǵan aımaqtardyń arqasynda megapolıstiń aýmaǵy keńeıdi. Sáıkesinshe bul — jańa jelilerdi qajet etedi.
«О́tip bara jatqan jyl jemisti boldy. Júzdegen shaqyrym sýmen jabdyqtaý, sý burý jelileri men birneshe KSS salyndy. Naýryzbaı aýdanynda súzgi-sorǵy stansasynyń qurylysy bastaldy», — dep jazdy ákim.
Buryndary habarlanǵanyndaı, ınjenerlik ınfraqurylymdy damytý aıasynda bıyl 300 shaqyrymǵa jýyq sý qubyry men káriz jelisi salyndy. Nátıjesinde, «Jańa Almatynyń» shetki yqshamaýdandarynyń 50 myń qala turǵyny ortalyq sýmen jabdyqtaý men sý burý jelisine qosylady.
2019 jyly aýdıt júrgizilip, onyń barysynda 2,3 myńǵa jýyq kóshede syrtqy jaryqtyń joq ekeni anyqtaldy. Nátıjesinde taıaýdaǵy 2 jyl ishinde qalany jaryqpen tolyq qamtamasyz etý jóninde sheshim qabyldandy. Jyl sońyna deıin qala shetindegi 1423 kóshe jaryqtandyrylady, bul qalanyń 4 aýdanynda 100% jaryqtandyrýdy qamtamasyz etedi.
2021 jyldyń sońyna deıin Almaly, Áýezov, Bostandyq, Medeý aýdandaryndaǵy qalǵan 601 kósheni jaryqtandyrý josparlanýda.
Jol ınfraqurylymyn damytý aıasynda Jańa Almatynyń yqshamaýdandarynda 42,8 shaqyrym jol salyndy. Uzyndyǵy 192 shaqyrym bolatyn 270 kóshede ortasha jóndeý, uzyndyǵy 86 shaqyrym bolatyn trotýarlardy retke keltirý jáne jóndeý jumystary aıaqtaldy. 4 saıabaq pen 5 jaıaý júrginshiler aımaǵyn abattandyrý qarastyrylýda.
Aǵymdaǵy jyly josparda kórsetilgen barlyq sharalar tolyq oryndaldy. Keler jyly shetki aımaqtardy damytý jónindegi jobalar iske asatyn bolatyn, ol úshin qarjylandyrý kózderinen jalpy somasy 200 mıllıard teńgeden astam qarajat bólinedi dep josparlanýda.
