Osyǵan oraı, Shámshi álemin keńinen nasıhattaý, zamandastary men ónerdegi izbasarlaryn kompozıtordyń týǵan topyraǵyna shaqyrý maqsatynda Almaty qalasynan jolǵa shyqqan respýblıkalyq zııaly qaýym ókilderi mingen «Sh.Qaldaıaqov» poezdy toǵyz joldyń toraby sanalǵan Arys qalasyna aıaldady. Quramynda mádenıet jáne óner qaıratkerleri, tanymal jýrnalıster, Shámshiniń zamandastary men týystary bar rýhanı kerýen aldymen Arys qalasynyń temir jol vokzalynyń jumysymen tanysty.
Qonaqtardy Arys qalasynyń ákimi Murat Qadyrbek kútip alyp, Shámshi ánge qosqan Arys jaǵasyndaǵy ajarly qalanyń búgingi kelbetimen tanystyrdy.
Sodan keıin Kópen Ámirbek, Tileýberdi Bınash, Áselhan Qalybekova Qazybek Isa, Qurmanbek Ońalbek, Álibek Shegebaı syndy óner maıtalmandary bastaǵan delegasııa Shámshiniń týǵan aýylyna attandy. Qonaqtar aldymen Sh.Qaldaıaqov aýylyndaǵy kompozıtor eskertkishine gúl shoqtaryn qoıý rásimine qatysyp, «Otyrar» halyq teatry ártisteriniń oryndaýyndaǵy «Shámshi» qoıylymyn tamashalady. Taıaýda ǵana kompozıtordyń mereıtoıyna oraı ashylǵan Sh.Qaldaıaqovtyń mýzeıimen tanysqan qonaqtar Shámshi jaıly estelikteri men áserli áńgimelerimen bólisti.
Arystan bab kesenesine zııarat jasaǵan delegasııa ókilderi Sh.Qaldaıaqov eskertkishiniń ashylý saltanatyna qatysý úshin Túrkistan qalasyna attandy.
