Pavlodarlyqtar áleýmettik jelide azyq-túlik baǵasynyń Jańa jyl qarsańynda aıaqasty kóterilgenine narazylyq bildirdi.
Olar qııar, qyzanaq, mandarın jáne taǵy basqa jemis pen kókónistiń qymbattaǵanyn jazdy. Bul jaıtqa óńir basshysynyń orynbasary kóz jetkizdi.
"Keshe úıge azyq-túlik alý úshin Sátbaev kóshesindegi Small dúkenine bardym. Satyp alýshylar kóp boldy, kassada kezek uzaq turdy. Eki kún buryn "Raqmet" bazaryna kóterme baǵany qadaǵalaý úshin barǵanmyn. Men bul shaǵymnyń oryndy ekenin qoldaımyn, baǵanyń negizsiz kóterilgeni kórinip tur. Bul ártúrli dúkende bir taýardyń baǵasy birdeı emes ekeninen bilindi. Onyń ústine olardyń keıbiri bir-birinen 50-100 metr jerde tur", dep jazdy Baıhanov.
Asaın Baıhanovtyń aıtýynsha，bólshek saýdada azyq-túlik baǵasyn tekserý úshin oblysta aımaqtyq komıssııa qurý týraly sheshim shyǵarǵan.
Onyń quramynda kásipkerlik jáne saýda, aýyl sharýashylyǵy basqarmasynyń, antımonopolııa organy, SES ókilderi bar. Sondaı-aq topqa ózi jetekshilik etetinin aıtty.
Oblys ákiminiń orynbasary tekseristiń qorytyndysy týraly habardar etýdi ýáde etti.
