Qonaqtar básekeni qarqyndy bastaǵanymen, qarsylastarynyń qaqpa kiltin uzaqqa deıin taba almady. Kersinshe, alǵashqy shaıbany aıdyn ıeleri soqty. 18-mınýtta Hanter Shınkarýk nysanan dál kózdedi. Odan keıin 35 mınýt boıy qos komanda bir-birimen arpalysqanymen, tablodaǵy esepti ózgerte alǵan joq. Tek 54-mınýtta Kertıs Volk pen Lınýs Vıdell uıymdastyrǵan shabýyldy Samat Danııar sátti aıaqtady. Osylaısha, oıyn overtaımǵa oıysty. Qosymsha ýaqytta Darren Lıs mergendik tanytty. Nátıjesinde bul match 2:1 esebimen «Barystyń» paıdasyna sheshildi.
Qazirgi kezde «Barys» QHL-dyń turaqty birinshiliginiń jarys kestesinde 17 oryndy ıelenýde. Jerlesterimiz 33 kezdesýden keıin 37 upaı jıdy. Elordalyq klýb óziniń kelesi kezdesýin 21 jeltoqsanda Tómengi Novgorodta jergilikti «Torpedoǵa» qarsy ótkizedi.
