Atqarylýǵa tıis aýqymdy sharalar toqtatyldy. Desek te Úkimet osyndaı tutqıyldan kelgen indetke tıisti sharalar qoldanyp, el-jurtty aman saqtap qalý jolynda irgeli ister atqarǵanyn aıtyp ótý kerek. Halyqtyń basym bóligi aýyryp, aýyrǵandar aıyǵyp, qurban bolǵandary da bar ekenin bilemiz. Jalpy alǵanda memleket ólim-jitim sanynyń az bolýyn qamtamasyz etý úshin áleýmettik sala tóńireginde júıeli jumystar júrgizdi.
Áleýmettik psıhologııalyq turǵydan halyqtyń kózi endi ashyldy ma dep oılaımyn. Oǵan sebep – indetpen birge kelgen túrli jańashyldyqtar men qubylystar.
О́mirdiń ózi kúres pen maıdan deımiz ǵoı, bul endi eki eselene túseri haq. Halyq sony túsingen sııaqty. Sonymen qatar osy ýaqytqa deıin «Densaýlyq – zor baılyq» dep aýyzsha aıtqanymyzben, júrekpen hám sanamen sený bolmady. Aýrý asqynǵanda dárigerge kórinetinimiz shyndyq, deı turǵanmen ózimizdiń tán saýlyǵymyzǵa mán berip, aýyryp em izdegenshe, aýyrmaıtyn jol izdeıtin dárejege jetkendeımiz. Densaýlyq buǵan deıin adamı qundylyqtar sanatynyń úshtigine ense, bul joly da sol bıiginen túsken joq. Kerisinshe adamdar onyń qadir-qasıetin tereń túsingendeı. Eldegi azamattar kóbi tabysynan aıyrylǵanyna qaramastan, aman-esen júrgenine, bir jutym aýany emin-erkin jutqanyna shúkir etip, táýbesine kelip otyr. Sebebi kórinbeıtin jaýmen soǵysa júrip aman qalýdyń ózi úlken olja boldy.
Memleket damýynyń ár salasyna áser etken pandemııa kemshiligimizdi de, jetispeýshiligimizdi de aıqyndap bergen sııaqty. Bizde oqý salasyndaǵy olqylyqtar men kemshin tustarymyzdy saralap, tótep berý úshin túrli amal-tásilder oılastyryp jatyrmyz. Qashyqtan oqytý nemese onlaın oqytýdy bilim salasynda burynda qoldanǵanbyz, biraq tolyq meńgermegen ekenbiz. Tehnıkalyq, metodıkalyq-dıdaktıkalyq jaǵynan oqytýshylar qaýymy beıǵam júrdi. Sebebi bul buryn asa qajettilik týdyrmady. Buryn ınformatıka bireýdiń kásibi, bireýdiń mamandyǵy boldy. Qazirgi ýaqytta bárimiz birinshi ınformatık, sodan keıin baryp ǵalym nemese jýrnalıst bolýymyz kerek. Pandemııa jurtqa ınformatıkanyń jeke-dara kásip emes ekenin, kerisinshe qoǵamdyq qoldanbaly daǵdymyz ekenin úıretti. Sol arqyly bilimińdi, bilgenińdi, qarym-qabiletińdi kórsetetin deńgeıge jetkizdi.
Ramazan SATTARULY,
áleýmettaný ǵylymdarynyń
kandıdaty, L.N.Gýmılev atyndaǵy Eýrazııa ulttyq ýnıversıtetiniń dosenti
