О́ńirlerdi osy keshendermen qamtý jumystary qarashanyń sońynda aıaqtalady dep josparlanýda. Atalǵan jyljymaly qondyrǵy azamattardyń densaýlyǵyn keń spektrli tekserýden ótkizýge arnalǵan. Ol jalpy qabyldaý, tájirıbelik dáriger jáne taldaýlardy qabyldaý aımaǵy, dárihana pýnkti, fýnksıonaldy dıagnostıka, akýsher-gınekolog, sondaı-aq sáýlelik dıagnostıka kabınetterinen turady.
Mobıldi medısınalyq ortalyqta arnaıy qorǵasynmen qaptalǵan bólme ornatylyp, onda rentgen jáne flıýorografııany qaýipsiz jaǵdaıda jasaýǵa bolady.
Kabınetter kompıýter, eden tarazysy, otoskop, oftalmoskop, bıohımııalyq jáne gematologııalyq analızator, koagýlograf, leıkosıtter eseptegishi, EKG, ÝDZ, glıýkometr sekildi zamanaýı sıfrly jabdyqtarmen qamtylǵan.
Medısınalyq keshenniń taǵy bir ereksheligi – avtonomdy júıe, atap aıtqanda avtobýsta 16 kılovattyq generator ornatylyp, qajet kezde qalalyq elektr jelisine de qosylýǵa qaýqarly. Tolyq termooqshaýlaý jáne antıkovıd júıesi qaýipsiz jumys isteý úshin ońtaıly jaǵdaı jasaıdy. Múmkindigi shekteýli jandardy qabyldaýǵa avtomattandyrylǵan pandýs-lıft qarastyrylǵan.
Jyljymaly medısınalyq keshen Densaýlyq saqtaý mınıstrliginiń tapsyrysyna sáıkes, otandyq kásiporyndarda jasaldy.
Densaýlyq saqtaý mınıstrligi men Indýstrııa jáne ınfraqurylymdyq damý mınıstrliginiń Jol kartasy aıasynda «О́nerkásipti damytý qory» AQ lızıngtik qarjylandyrý tetigi esebinen elimizde bıyl uzyn sany 1167 sanıtarlyq avtokólikti jańartý josparlanǵan.
