«Sizder óte qıyn kezde janashyrlyq pen qamqorlyq tanytyp, kómekke muqtaj jandarǵa qolushyn sozdyńyzdar. Árbirińizdi maqtan tutamyn, ıgi is atqaryp, jaqsy bastama kótergen ár qazaqstandyqpen maqtanamyz. Sizder arnaıy ýaqyt bólip, dári-dármek pen tamaq tarattyńyzdar, aýrýhanaǵa kómektesip, naýqastarǵa úmit syıladyńyzdar», dedi mınıstr.
Densaýlyq saqtaý mınıstri COVID-19-ǵa qarsy kúreske qatysyp, dárigerlerge kómektesip, túski as uıymdastyrǵan, muqtaj adamdardy azyq-túlikpen qamtamasyz etkenderdiń barlyǵyna alǵysyn bildirdi. Mınıstrdiń pikirinshe, bul – shynaıy patrıotızmniń úlgisi.
«Búgin Qazaqstandaǵy volonterler qozǵalysynyń az ǵana bóligine alǵys hat tabystaımyz. Eger múmkindik bolsa, men ár eriktiniń qolyn alyp, alǵys aıtar edim. Árqaısyńyzǵa raqmet», dedi vedomstvo basshysy.
Qoǵam qaıratkeri, «DA-VINCI» túzetý ortalyǵynyń jetekshisi jáne volonter Merýert Baızırova mınıstrge qoldaýy úshin alǵysyn bildirdi. Karantın kezinde ol jetekshilik etken eriktiler toby elordalyq ınfeksııalyq aýrýhananyń medısınalyq qyzmetkerlerine tegin tamaq uıymdastyrdy, qymbat dári-dármek satyp aldy, dári-dármek pen JQQ tasymaldaýdy uıymdastyrdy, medısına qyzmetkerlerin kólik tasymalymen qamtamasyz etti.
«250 adam birigip, otbasylarǵa kómektesý úshin qarajat jınaı bastady. Bizdiń top aı saıyn 300 myń teńgeden jınap, aıyna bir naýqas balaǵa kómektesti. Sondaı-aq koronavırýstan zardap shekken dárigerlerdi nazardan tys qaldyrmadyq», dedi Merýert Baızırova.
Volonterler jylyna oraı jáne pandemııaǵa qarsy kúreske qosqan úlesi úshin 100-den astam eriktige Densaýlyq saqtaý mınıstriniń alǵys haty tabystaldy.
Olardyń ishinde Medsupportkz negizin qalaýshy Aqmaral Tursynova aqparattyq qoldaý uıymdastyrdy, Qazaqstan, Eýropa elderi, AQSh jáne Japonııadan kelgen 100 ǵalym men dárigerdiń basyn qosty. Medsupportkz portaly COVID-19 boıynsha ǵylymı jumystardy orys jáne qazaq tilderine aýdardy, halyqtyń COVID-19-ǵa qatysty túrli suraqtaryna jaýap berdi.
«Medısına qyzmetkerlerine túski as» jobasynyń negizin qalaýshy Aısulý Tustyqbaevanyń komandasy qaıyrymdylyq konsertter arqyly qarajat jınady, al jınalǵan aqshaǵa kafe men meıramhanalardan túski asqa tapsyrys berip, COVID-19-ǵa qarsy kúreske tikeleı tartylǵan aýrýhanalarǵa tamaq jetkizdi. «Teaching For Heroes» negizin qalaýshy Ilıa Kan onlaın platformada dárigerlerdiń balalaryn oqytýǵa arnalǵan aǵylshyn tili sabaqtaryn uıymdastyrdy. «Túski astyń» negizin qalaýshy Rasıma Temirbaevanyń komandasy qarajat jınap, zeınetkerlerdi túski aspen qamtamasyz etti, muqtaj adamdarǵa azyq-túlik satyp aldy. «Shuǵyla» qoǵamdyq qorynyń negizin qalaýshy Meıirhan Ábdirahmanov eriktilerdiń 4 myń ottegi konsentratoryn satyp alý úshin qarajat jınady. Kásipkerler, janashyr azamattar memlekettik organdardyń qoldaýymen 450 mıllıon teńge jınady. «Aqjurek-2020» jobasynyń negizin qalaýshy Ajar Jandosovanyń komandasy Covid-19-ǵa qarsy kúreske tartylǵan dárigerlerge JQQ, maska men qolǵap satyp alýǵa jáne jetkizýge qarajat jınady. «GREEN AUTOSERVICE» bas dırektory Erlan Nurpeıisov pandemııa kezinde eki jeke klınıkanyń jumysyn uıymdastyrdy, eriktilerdiń qyzmetin úılestirdi, júkterdi shoǵyrlandyryp, dárilik zattar men preparattardy taratty, tasymaldady. «OAD-27» JShS dırektory Elena Kýznesova eki klınıkaǵa 20 mln teńgeden astam qarjyǵa jedel dári-dármek jiberdi. Qaraǵandy medısınalyq joǵary oqý ornynyń besinshi kýrs stýdenti Daryn Ábiljanov KVI-ge shaldyqqan naýqastardyń úıin aralap, ıneksııa jasady, emdedi jáne jaǵdaıyn baqylady. Almaty qoǵamdyq baqylaý tobynyń úılestirýshisi Saıda Taýkeleva gýmanıtarlyq kómek bólip, dárihana, medısınalyq mekemelerge monıtorıng júrgizdi jáne halyq arasyndaǵy karantındik sharalardyń saqtalýyn qadaǵalady.
