Aqtóbe qalasy, Áıteke bı, Shalqar, Mártók, Temir, Oıyl, Qobda aýdandaryndaǵy orman sharýashylyǵy mekemelerine jergilikti bıýdjetten bólingen 212 mıllıon teńgege 6 traktor, jerdi tereńdetip jyrtatyn arnaýly tehnıka, kóshet otyrǵyzýǵa arnalǵan 14 soqa satyp alyndy.
О́ńir basshysy Ońdasyn Orazalın orman sharýashylyǵy mekemelerine tehnıka kiltterin tabystaý kezinde eldi mekenderdiń irgesin qum basýdy toqtatý jumystaryn jandandyrý qajettigin aıtty. О́ıtkeni, sońǵy jyldary tabıǵat janashyrlary Baıǵanın, Shalqar, Yrǵyz, Áıteke bı, Temir aýdandarynyń kóptegen eldi mekenderin qum basyp bara jatqany jóninde dabyl qaǵyp, ony toqtatý úshin shól jáne shóleıt aımaqtarda tobylǵy men jyńǵyl kóshetterin kóptep otyrǵyzý qajettigin eskertip júr. Jas óskinder jersinip ketkenshe jaqsylap kútip-baptalǵanda ǵana eldi mekenderdiń jappaı qum basýyn edáýir tejeýge bolady, deıdi olar.
Jasyl beldeý aımaǵyn qurý jobasy boıynsha kelesi jyldan bastap oblys aýmaǵyndaǵy orman sharýashylyǵy mekemeleriniń ıeligindegi qaraýsyz qalǵan toǵaılar qaıta jańartylyp, 2690 ga alqapqa jasyl jelek otyrǵyzylady. Munymen bir kezde eldi mekenderde 1 mln túp aǵash kóshetteri egiledi. Jappaı kógaldandyrý jumystaryn qol kúshimen atqarý qıyn bolǵandyqtan, 2021 jyly jergilikti bıýdjet esebinen qosymsha 1,4 tonnalyq 21 traktor, 4 sorǵylaýshy, 9 aǵash otyrǵyzatyn arnaýly tehnıka satyp alý josparlanǵan.
Qazirgi ýaqytta Aqtóbe oblysynda orman sharýashylyǵy qorynyń jalpy aýdany 215 814 gektardy quraǵanymen, onyń 50 362 gektarynda ǵana toǵaı ósken. Osydan kórinip turǵandaı, óńirdegi orman qorynyń tórt ese azaıyp ketýine orman sharýashylyǵy mekemeleriniń aty bar da, zaty joq qurylymǵa aınalyp, aǵashtardy qorý, ekpelerdi kútip-baptaý jumystarynyń qadaǵalanbaýy sebep boldy. Onyń ústine, Aqtóbe qalasy men aýdandarynda aǵashtar aıaýsyz kesilip, egilgen jas kóshetter qýrap jatsa da, osy kezge deıin eshbir quzyrly mekeme jaýap bergen emes.
Oblystyń tabıǵat qorǵaý mekemeleri Ekologııa mınıstrligimen birlese otyryp, Aqtóbe oblysy aýmaǵynda 2021-2025 jyldary 30,7 myń ga alqapqa 60,1 mıllıon túp jas kóshet otyrǵyzýdy josparǵa engizdi.
Kezeń-kezeń boıynsha iske asyrylatyn jasyl beldeý jobasyna sáıkes, 2021 jyly – 1086 ga, 2022 jyly –7333,1 ga, 2023 jyly –7142,2 ga, 2024 jyly – 6558,6 ga, 2025 jyly –8624,3 gektar jerge qurǵaq klımatqa tózimdi aǵash pen buta túrleri otyrǵyzylyp, jasyl jelek kásibı ormanshylardyń qolymen kútip-baptalatyn bolady.
