Birikken koroldik kóleminde vırýstyń jańa shtammy jaıyndaǵy aqparat 14 jeltoqsanda jaryq kórip, eldiń premer-mınıstri Borıs Djonson 20 jeltoqsanda Londonda, Shyǵys, Ońtústik Shyǵys jáne Ýels aımaqtarynda lokdaýn jarııa etisimen Eýropanyń birqatar memleketteri Ulybrıtanııamen aradaǵy barys-keliske shekteý qoıa bastady.
Atap aıtqanda, Germanııa densaýlyq saqtaý isiniń basshysy Iens Shpan Ulybrıtanııadan dúısenbi kúni, ıaǵnı 21 jeltoqsannan bastap áýe baılanysynyń toqtaıtynyn habarlasa, Fransııa 48 saǵatqa birikken koroldikten jolaýshy jáne júk tasymalyn doǵara turýdy sheshken.
Sonymen qatar Nıderland memleketi áýe jáne temirjol qatynasyn jańa jyldyń basyna deıin úziletinin málimdep, Italııa úkimeti de aralǵa sońǵy eki apta ishinde barǵan óz azamataryna elge qaıta kirýdi keıin shegerý qajettigin aıtyp, eki aradaǵa áýe baılanysynyń toqtaı turatynyn habarlady. Belgııa koroldigi de etek-jeńin qymtap, Ulybrıtanııaǵa ushaq ushyryp, olardan qabyldaýdy ázirge toqtatatynyn málimdegen.
Italııa úkimetindegi densaýlyqqa jaýap beretin vedomstvonyń habarlaýynsha jańa shtammnyń juǵý jyldamdyǵy burynǵydan áldeqaıda joǵary kórinedi.
Qaýipti shtammǵa qatysty qadamdardy EO-ǵa múshe elderdiń barlyǵy birdeı qabyldap jatyr. Máselen, Estonııa men Latvııa da jyldyń aıaǵyna deıin Ulybrıtanııamen aradaǵy áýe qatynasyn toqtata turmaqshy.
Jańa shtamm EO quramynan bas tartqan Ulybrıtanııany oqshaýlaýda kári qurlyqtaǵy odaqtastar úshin «Qulannyń qasynýyna, myltyq shúrippesiniń basylýyna» saıatyndaı jaqsy bir tetik bolǵanǵa uqsaıdy.
