Kezeń-kezeńimen júrgizilip jatqan júıeli sharalardyń arqasynda mektepke deıingi mekemelerdegi oryn tapshylyǵy máselesi ońtaıly sheshile bastaǵan. Máselen, 2020 jyly Alataý, Almaly, Túrksib jáne Bostandyq aýdandarynda 670 orynǵa shaqtalǵan tórt memlekettik mektepke deıingi uıym ashyldy. Sonymen birge, 1378 oryndyq 48 jekemenshik mektepke deıingi uıym óz jumysyn bastaǵan. Sondaı-aq, memlekettik balabaqshalardy qaıtarýǵa arnalǵan sharalar da jemisti jalǵasýda.
"Qazirgi ýaqytta Áýezov aýdanyndaǵy "Skazka" balabaqshasynyń ǵımaraty jalǵa berýden qaıtaryldy. 2021 jyly 320 orynǵa eseptelgen on tórt toptan turatyn memlekettik balabaqsha ashý josparlanýda. Almaty qalasynda balabaqsha kezegin azaıtý úshin sońǵy 3 jylda 1950 orynǵa arnalyp 10 memlekettik balabaqsha salyndy. Jekemenshik mektepke deıingi mekemelerdi ashý úshin barlyq jaǵdaı jasalýda jáne sońǵy 3 jylda 9368 orynǵa arnalǵan 380 jekemenshik mektepke deıingi uıym ashyldy», - dep atap ótti Aısulý Botaeva.
Almatyda 2021-2025 jyldar aralyǵynda 15 memlekettik jáne 324 jekemenshik balabaqshanyń qurylysy josparlanǵan.
Búgingi kúni megapolıste 65 080 bala kontıngentin qamtıtyn 824 mektepke deıingi uıym jumys isteıdi, onyń ishinde: memlekettik balabaqshalar – 189, jekemenshik balabaqshalar – 399, shaǵyn ortalyqtar-236. 2020 jyly bir jastan alty jasqa deıingi balalardy mektepke deıingi tárbıemen jáne oqytýmen qamtý 63,5% - dy, bul rette úsh jastan alty jasqa deıingi balalardy qamtý-89,4%-dy quraıdy. Sonymen qatar, memlekettik jeke seriktestik aıasynda qalada 1751 orynǵa shaqtalǵan 31 jekemenshik mektepke deıingi uıym jumys isteıdi. Memlekettik bilim berý tapsyrysy 397 jeke balabaqshada 20441 orynǵa ornalastyrylǵan.
Atap ótetin jaıt, memlekettik balabaqshaǵa joldama alý úshin balabaqsha.open-almaty.kz elektrondy júıesi qoldanylady. Sonymen qatar, 2020 jyldan bastap mektepke deıingi sanatorıılik jáne túzetý uıymdaryna joldama berý jáne qoıý (ornatý) prosesi avtomattandyryldy, tárbıelenýshilerdiń sabaqqa qatysýynyń elektrondyq tabeli júrgizilýde. Bul memlekettik bilim berý tapsyrysyn júzege asyrý kezinde buzýshylyqtardyń aldyn alady. 2021 jylǵa qaraı elektrondyq mázirin, sondaı-aq balalardyń eptilikteri men daǵdylaryna monıtorıng júrgizýdiń avtomattandyrylǵan júıesin ázirleý josparlanǵan.
