Kompanııanyń strategııalyq damý baǵyttaryn qaıta qaraý 2020 jylǵy pandemııa daǵdarysynyń jáne uzaq ýaqyt karantınge baılanysty tutynýshylyq ádetterdiń sózsiz ózgerýiniń saldary boldy. Eń aldymen, e-commerce úlesiniń artýy jáne online-servısterdi jandandyrýy boldy.
Qanat Alpysbaev 2020 jyldyń keıbir aldyn ala qorytyndylary týraly habarlady. Atap aıtqanda, halyqaralyq poshta jóneltilimderiniń sany 30% - ǵa qysqardy, kommýnaldyq tólemderdi qabyldaý/tóleý kólemi 13% - ǵa tómendedi. Aqsha aýdarymdarynyń mólsheri 22% - ǵa tómendedi.
Osyǵan oraı «Qazposhta» EMS jedel jetkizý segmentinde 15% - ǵa jáne sálemdemelerdi jóneltý/alý kólemi 30% - ǵa óskenin atap ótti.
Barlyq derekter ótken jyldyń sáıkes kezeńimen salystyrǵanda 2020 jyldyń 11 aıy úshin usynylǵan.
Sondaı-aq spıker atap ótkendeı, tólem kartalary emıssııasynyń (+74%) jáne osy segmenttegi kompanııa kiristeriniń (+58%) aıtarlyqtaı ósýi baıqalady. «Qazposhtanyń» tólem kartalary boıynsha qolma-qol aqshasyz tólemder kólemi 2020 jyldyń 11 aıynda 804% - ǵa ósti.
Kompanııanyń strategııalyq damý baǵyttary týraly «Qazposhta» AQ strategııa jáne qarjy jónindegi Basqarýshy dırektory Gaýhar Ádilova aıtyp berdi.
Halyqaralyq poshta ákimshilikteriniń tájirıbesin jáne poshta-logıstıkalyq qyzmetter naryǵyndaǵy jalpy álemdik úrdisterdi nazarǵa ala otyryp, kompanııa damýdyń negizgi baǵyttaryn anyqtady:
- e-commerce sektoryn damytý úshin jeke ekojúıeni qurý;
- aýqymdy sıfrlyq transformasııa;
- uıymdastyrýshylyq transformasııa.
Spıkerler atap ótkendeı, bul sharalardyń barlyǵy «Qazposhta» AQ-ǵa kýrerlik jetkizý naryǵyndaǵy úlestiń taıaý jyldary qazirgi 20% - dan 60% - ǵa deıin ósýine senim artýǵa múmkindik beredi. Osy maqsatqa jetý úshin kompanııa sapaly ózgeristerge eleýli nazar aýdarýǵa, óz qyzmetteriniń yńǵaılylyǵy men qol jetimdiligin arttyrýǵa, jetkizý ýaqytyn azaıtýǵa nıetti jáne óz klıentterine kompanııanyń barlyq qyzmet túrlerin (qarjy, poshta, agenttik-brokerlik) biriktiretin jańartylǵan mobıldi qosymshalar usynbaq.
Sonymen qatar Basqarma tóraǵasy Qanat Alpysbaev «Qazposhta» AQ búgingi tańda 3 728 bólimsheni qamtıtyn óziniń fılıaldyq jelisin damytýdy jalǵastyratynyn atap ótti. Atap aıtqanda, sıfrlyq transformasııa aýyldyq poshta bólimsheleriniń qyzmetine áser etedi, onda aýyl turǵyndary memlekettik qyzmetterdi online-formatta ala alady. Tutastaı alǵanda kompanııa bólimsheniń ornalasqan jerine qaramastan, óz ónimderi men qyzmetteriniń barlyq jelisine teń qol jetkizýdi usyný qaǵıdatyn ustanady.
«Halyqaralyq seriktestik turǵysynan «Qazposhta» AQ Halyqaralyq poshta jóneltilimderiniń tranzıtin jandandyrý jónindegi jobalarǵa qatysýdy keńeıtýge, logıstıkalyq múmkindikterdi kúsheıtýge nıetti jáne shekara mańyndaǵy óńirlerde bond qoımalaryn damytý jónindegi jobany iske asyrýdy jalǵastyrady», dep habarlady Qanat Alpysbaev.
