Aqtóbe oblystyq Tótenshe jaǵdaılar departamenti mamandarynyń habarlaýynsha, bıylǵy jyly ótken jylmen salystyrǵanda 4 ese kóbeıgen órtterdiń saldarynan keltirilgen materıaldyq shyǵyn kólemi de 123 mıllıon teńgege artqan. Sonyń ishinde jeke turǵyn úı sektorynyń jalynǵa oranýy jıilep barady. Oǵan negizinen turǵyndardyń qarapaıym qaýipsizdik erejelerin saqtamaýy, ekinshi jaǵynan jylytý qondyrǵylary men aqaýy bar peshter de sebepshi bolǵan. Al jylytý maýsymy bastalǵaly gaz ballondarynyń jarylýy oqıǵalary jıilep ketti. Sondyqtan da TJD mamandary gaz quıý beketterinde toltyrylǵan gaz ballondarynyń turǵyn úı jaǵdaıynda saqtalýyna erekshe abaı bolý qajettigin eskertedi. 15 qarasha kúni tańerteńgilik ýaqytta Hromtaý qalasynda úı ishinde gaz ballony jarylyp, odan tutanǵan órtten bir otbasynyń tórt adamy zardap shekken. О́kinishke qaraı sol úıdiń otaǵasy aýrýhanaǵa jetkizilgen boıy qaıtys boldy. Oqıǵaǵa syrtta salqynda turǵan gaz ballonynyń úıge kirgizilip, jylýdyń áserinen ydystaǵy gaz kondensatynyń kóterilýi jarylysqa ákelgen.
Aqtóbe oblystyq TJD basqarma basshysy Evgenıı Ovcharskıı turǵyndarǵa qatty aıazda qatyp turǵan gaz ballonyn úıge kirgizýden saq bolý qajettigin eskertedi. О́ıtkeni ballon ishinde jınalǵan gaz kondensatynan qysym kóbeıip, jarylysqa ákelýi múmkin. Bul jerde gaz quıý beketteriniń de kinási kóp. Beket qyzmetkerleri gaz ballondaryn 85 paıyzdan artyq toltyrmaýy tıis bolsa da, olar qarapaıym tehnıkalyq erejeni saqtaı bermeıdi. Birer kún Mártók aýdanynda da osyǵan uqsas oqıǵa qaıtalanyp, aıazda turǵan ballondy úıge kirgizgende, jylýdyń saldarynan gaz toltyrylǵan ydys jarylǵan. Baqytyna oraı zardap shekken adam joq.
Kóp qabatty úılerde temeki tuqylynan tutanǵan órt oqıǵalary da jıilep ketken. Oblystyq tótenshe jaǵdaılar departamentiniń mamandary jas balalardy úıde eresekterdiń baqylaýynsyz jalǵyz qaldyrýǵa bolmaıtyndyǵyn qatań eskertedi. 19 jeltoqsan kúni kúndizgi ýaqytta Aqtóbe qalasyndaǵy "Batys-2" yqsham aýdanyndaǵy kópqabatty úıdiń bir páterin tutas sharpyǵan órtke jas balalar sebepshi bolǵan. Shaqyrtý túsken boıy qaladaǵy órt qyzmetiniń búkil quramy tegis jumyldyrylyp, 70 turǵyn syrtqa shyǵarylyp, jalyn tez sóndirildi.
Jańa Jyl merekesinde de órt jıileıtini jyl saıyn qaıtalanatyn jaǵdaı. Byltyr Jańa Jyl merekesinde oblysta 15 órt oqıǵasy tirkelgen. Mereke kúnderi pırotehnıkalyq zattardyń saldarynan órttiń tutaný qaýpi joǵarylaıdy. Qazirgi kezde TJD mamandary men polıseıler qaladaǵy pırotehnıkalyq zattar satatyn dúkender men bazarlarǵa lısenzııalaryn tekserý maqsatynda reıd júrgizýdi bastady.
