Sebebi muǵalimniń kóz aldynda bilim alyp otyrǵan bala kenetten ekrannyń arǵy jaǵynan ǵana sálemdesip, tyńdaıtyn kúıge tústi. Biz oqytýdyń jańa formatyna kóshýge májbúr boldyq. Mine, mundaı jaǵdaı bilimniń sapasyna sózsiz áser etedi. Osyndaı qıyn-qystaý kezeńde qaıyspaı qyzmet etip júrgen áriptesterim – pedagog qaýymǵa alǵysymyz sheksiz. Olarǵa, eń bastysy, memleket erekshe kóńil bólip keledi. Muǵalimderdiń eńbegi – eleýli, olar dál qazirgideı syn saǵatta elimizdi daǵdarystan alyp shyǵý jolynda jan aıamaı jumys istep júr.
Memleket basshysy Qasym-Jomart Toqaev Táýelsizdik kúni qarsańynda ótken Memlekettik nagradalar tapsyrý rásiminde pedagogterdiń eńbegin qaýipti indetpen qasqaıa kúresip júrgen dáriger qaýymmen qatar aıtýy osyǵan dálel bola alady. «Dárigerler men muǵalimderdiń kúndelikti ómirimizdegi mańyzdy rólin aıqyn sezindik», degen Prezıdent pedagogter eńbekaqysynyń 25 paıyzǵa óskenin atap ótti. Jalpy, Memleket basshysy osyǵan deıin muǵalimderdiń jalaqysyn
4 jylda 2 ese arttyrýǵa ýáde berdi, minekı sol sózinde turyp keledi. Jalpy alǵanda, bilim salasy basqa salalarǵa qaraǵanda qarajat bólinisi jaǵynan aldyńǵy qatarda kele jatyr.
Egemen eldiń erteńi, Prezıdent aıryqsha atap ótken adam kapıtaly – bilimdi urpaq. Al urpaq bilimdi bolý úshin olardy tárbıeleıtin, oqytatyn muǵalimderge kóńil bólýimiz kerek. Negizinen bizdiń bolashaǵymyz jastar ǵoı, sol sebepti jas pedagogterdi osy salada ustap qalǵymyz kelse, olardy qoldaýǵa kóńil bólý qajet. О́ıtkeni muǵalimderdiń jalaqysy kóbeıdi degenmen, sol saladaǵy jas mamandardyń qolyna alatyny kóńil kónshitpeıdi. Endigi jerde osy baǵytty basty nazarǵa alǵanymyz abzal.
Aıagúl MIRAZOVA,
matematıka pániniń muǵalimi,
Qazaqstannyń Eńbek Eri
