13 jeltoqsanda IIM Almaty akademııasy ashanasynyń qosalqy bólmeleriniń birinde 19 jastaǵy Salamat О́tegenov asylyp qalǵan. Ony sheship alǵanda, ol tiri bolǵan, biraq keıinirek kelgen jedel járdem brıgadasy jigitti qutqara almady. Ol Almaty ýaqytymen saǵat 16:52-de qaıtys bolǵan.
Sol kúni, keshki saǵat 19-da Salamattyń ata-anasyna IIM akademııasynan qońyraý shalyp, balasy óz-ózine qol jumsady dep habar bergen. 15 jeltoqsanda Salamattyń máıitin akademııanyń eki ofıseri Oral qalasyna jetkizip beredi. 16 jeltoqsan kúni Salamat týǵan jeri Aqjaıyq aýdany, Shabdarjap aýylyndaǵy zıratqa jerlendi.
Ulynan aıyrylyp, qara jamylyp otyrǵan Bekzat Imanǵalıevanyń aıtýynsha, Salamattyń bala kezinen tehnıkaǵa qyzyǵýshylyǵy joǵary bolypty. Ol 10 synybynda IIM Almaty akademııasynyń janynan baǵdarlamalaý, tehnıka jáne radıobaılanyspen baılanysty tehnıkalyq fakýltet ashylatynyn esitip, sol fakýltettiń alǵashqy kýrsanty bolýǵa nıettenip, 2018 jyly oqýǵa túsedi.
Memlekettik grantpen bilim alyp jatsa da, anasy ulynyń óte jıi aqsha suraıtynyn baıqaǵanyn jasyrmady. Bul jaǵdaı kýrstanttardyń ata-anasy arasynda da talqylanǵan eken. Olar balalary úshin akademııa tarapynan suralǵan (zańsyz) aqshany amal joq berip otyrǵan. Máselen Akademııada kıetin arnaıy kıimnen bastap, azyq-túlik pen turmystyq tehnıka úshin de kýrsanttar óz qaltasynan qarajat shyǵaryp kelipti. Sáıkesinshe marqumnyń týystary da balasyna bul somany jıi jiberip otyrypty.
Olar emtıhan kezinde oqytýshylar tarapynan Salamattan sessııany joǵary upaımen tapsyrsa da, jaqsy baǵa alý úshin 80 myń teńge, keıbir kezderi odan da kóp somada qarajat talap etip kelgenin, al narıadqa túsý úshin ol bireýge 2,5 myń teńgeden berý kerek ekenin eske alyp otyr. Týystary mundaı jaǵdaı óz balasynyń basynda ǵana emes ekenine de senimdi.
- Salamat oqýǵa keter kezde de ár joly oǵan jańa arnaıy kıim men aıaq kıim alyp berip otyrdyq. dese de ol Almatyǵa barǵan soń ylǵı eski ári basqa bireýdiń kıimimen júretinin baıqaıtynbyz. Bul bir ret bolǵan jaǵdaı emes. Sondaı-aq oqýdan oralǵanda tozyǵy jetip, jyrtylyp qalǵan basqa aıaq kıimmen qaıtatyn, deıdi ata-anasy.
Olardyń paıymynsha, osynsha ýaqyt boıy Salamatqa qysym kórsetilip kelgen. О́ıtkeni marqum kýrsant sońǵy ret úıine kelgende Akademııaǵa qaıtqysy kelmeıtinin ashyq aıtqan. Ol oqýyn Oraldaǵy jergilikti JOO-ǵa aýystyrýǵa nıetti ekenin de jasyrmapty. Eshteńeden kúdiktene qoımaǵan anasy, ulynyń ol nıetine mán bere qoımapty.
Salamat Akademııaǵa barǵan soń aqsha suraýy qaıtadan jıileı túsken. Bul joly 10-20 myń teńge emes, 100 myńnan bastalatyn qarajat qajet etken.
- Men bir kúni odan nege únemi osyndaı qomaqty qarajat kerek ekenin suradym. Balam maǵan jaýap retinde: «Apa, eger siz maǵan qazir keshke 100 myń jibermeseńiz, tańerteń men 200 myń teńge qaryz bolyp qalamyn», dedi. Men ol kezde ulymdy «eseptegishke» otyrǵyzǵanyn birden túsine qoımadym. 100 myń teńge taptym. Keıinirek ol 100 myń emes, 200 myń berýimdi surady. Bul joly shydamym taýsyldy, men ol budan artyq aqsha almaıtynyn aıtyp edim», dep eske alady áıel.
Anasynyń bul suraǵyna Salamat «Bul týraly bireýge aıtar bolsańyzdar meni umytyńyzdar» nemese «osynsha qarajat jibermeseńizder qol-aıaǵymnan aıyrylýym múmkin» degen sózder de aıtqan. Keıingi 3,5 aıdyń ózinde týystary Salamatqa 630 myń teńge aýdarypty.
Salamat О́tegenov ómiriniń sońǵy kúninde saǵat 11.00-den bastap aǵasyna 300 myń teńgeni Almaty ýaqyty boıynsha saǵat 17.00-ge deıin jiberýin surap tynymsyz habarlama jibergen. Al aǵasy Salamattyń habarlamalaryn tek keshke kóripti. Salamattan sońǵy habarlama 16:31-de kelgen. «Men kettim» degen mátin rasynda jas kýrsanttyń týystaryna aıtqan sońǵy sózi eken.
Marqumnyń týystary aıtqan Akademııadaǵy kýrsanttardan únemi aqsha jınaýǵa qatysty IIM akademııasy jaýap bergen joq. Dese de bul jaǵdaılar Ishki Ister mınıstrligi tarapynan tekserilip jatyr. Sondaı-aq mınıstrliktiń baspasóz qyzmeti Akademııa bastyǵy O.H.Smaıylovtyń qyzmetininen bosatylǵanyn jáne kýrsanttyń qupııa ólimine qatysty tekserý amaldary júrip jatqanyn habarlady.
