26 jeltoqsan, senbi kúni aımaq basshysy Berdibek Saparbaev Taraz qalalyq kópbeıindi aýrýhanasynda bolyp, dárigerlermen vaksınasııa barysyn talqylady. Oblystyq densaýlyq saqtaý basqarmasynyń basshysy Áset Qalıev eriktilerge vaksına egý júrgizilip jatqanyn jetkizdi. Olardyń densaýlyqtary tolyǵymen jaqsy, aýrýdyń sozylmaly túrleri jáne allergııalyq reaksııalary bolmaýy kerek.
«On kún ishinde myń jambyldyqty vaksınamen qamtý josparlanýda. Eriktilermen kelisimshar jasalynady. Ineksııadan keıin sýbektilerdiń antıdeneleri men ımmýnıteti tekseristen ótedi. Birinshi jáne ekinshi kezeń barysynda 244 qazaqstandyq testileýge tartyldy desek, olardyń barlyǵynda sátti ótti. Jaǵymsyz reaksııalar nemese asqynýlar baıqalǵan joq», - dedi ol.
Berdibek Saparbaev vaksınasııaǵa kelisken eriktilerdi áńgimege tartty. Olar ózderin jaqsy sezinetinderin jáne týystaryn da vaksınasııalaý úshin ákelgisi keletinderin jetkizdi.
«Vaksına - halyqty ártúrli aýrýlardan qorǵaýdyń eń tıimdi ádisteriniń biri bolyp qala beredi. Bizdiń otandyq vaksına koronavırýstyń taralýyn toqtatýǵa kómektesedi», - dedi oblys ákimi.
Dárigerlermen áńgime barysynda Berdibek Saparbaev vaksınasııa pandemııany eńserýdiń mańyzdy qadamy ekenin atap ótti.
«Memleket basshysynyń tapsyrmasy boıynsha Qordaı aýdanynda túrli vaksınalar onyń ishinde Sovid-19-ǵa qarsy vaksına shyǵaratyn bıofarmasevtıkalyq zaýyt salynyp jatqany barshaǵa málim. Sondyqtan dál osy zertteýler bizdiń oblysymyzda júrgizilýde. Klınıkalyq synaqtar óndiristi múmkindiginshe tez iske qosýǵa múmkindik beredi. Jambyl oblysy Orta Azııa aýmaǵynda alǵashqylardyń biri bolyp qaýipti indetke qarsy óz vaksınasyn shyǵarǵaly otyr. Bul oraıda kóp dúnıe dárigerlerge baılanysty. Sizderge de ońaı emes ekenin túsinemiz. Azamattardyń qaýipsizdigi men densaýlyǵy sizderdiń qoldaryńyzda ekenin umytpaýlaryńyzdy suraımyz. О́z kezeginde, oblys basshylyǵy da sizder úshin barlyq jaǵdaıdy jasaýǵa tyrysady», - dedi aımaq basshysy dárigerlerge.
