Demokratııalyq partııanyń kandıdattary elordalyqtardy ózderiniń saılaýaldy baǵdarlamasymen tanystyryp, saılaýshylardyń suraqtaryna jaýap berdi.
Úgit-nasıhat tobyn bastap kelgen Danııa Espaeva men Sultan Han Júsip Ulttyq kitaphana ujymyna «Túbegeıli ózgerister qajet» saılaýaldy baǵdarlamasy men partııa qyzmeti týraly aıtyp berdi.
Kitaphana qyzmetkerleri «Aq joldyń» áleýmettik saladaǵy usynystary men bastamalaryn yqylaspen qabyldady. Olardyń aıtýynsha, Ulttyq kitaphanada 140 adam jumys isteıdi, onyń 40 paıyzy – jastar. Qazirgi tańda turǵyn úı máselesi óte ózekti bolyp otyr.
Sondyqtan partııanyń jastarǵa arnalǵan jataqhanalar salý jónindegi usynysy erekshe qoldaý tapty. Jumysshy jastarǵa qoldaý kórsetý, olardyń áleýmettik máselelerin sheshý arqyly elimizdegi jas azamattar men jas otbasylardyń jaǵdaıyn jaqsartýǵa múmkindik bar.
«Bul jastardy qoldaý úshin óte qajetti shara. Sondaı-aq biz sizderdiń ıpotekany sýbsıdııalaý jónindegi usynystaryńyzdy da qoldaımyz», dep atap ótti kitaphanashylar. Kezdesýge qatysýshylar uzaq ýaqyttan beri salynyp bitpegen úıler, onyń ishinde «Baspana Kóktal» TK qurylysy máselesin de kóterdi.
Sonymen qatar olar balalar kitaphanalarynyń qajettiligi týraly aıtty. Búgingi tańda elimizde 256 balalar kitaphanasy bar, olardyń 7-eýi ǵana arnaıy mártebege ıe.
Kitaphana qyzmetkerleriniń aıtýynsha, bul taqyryp ata-analardy da, muǵalimderdi de mazalaıdy. Jalpy, óskeleń urpaqtyń bilim alýy men saýatty bolýy, olardy kitap oqýǵa qyzyqtyrý sekildi máselelerdi jańa zamanaýı, oqyrman suranysyna tolyqtaı jaýap beretin kitaphanalar salý arqyly júzege asyrýǵa bolady.
Danııa Espaeva kezdesýge qatysýshylardyń kótergen barlyq máseleleri nazarǵa alynatynyn jáne olar partııanyń aldaǵy jumysynda eskeriletinin habarlady.
Osyǵan deıin jas «aqjoldyqtar» áleýmettik jelilerde arnaıy naýqan bastaǵan edi. Onlaın-naýqan partııanyń Mańǵystaý oblystyq fılıaly janyndaǵy «Aq jol» – jastar» jastar qanatynan bastaý aldy.
Jelilerdegi shara aldaǵy Parlament Májilisi men barlyq deńgeıdegi máslıhattar saılaýyna baǵyttalǵan. «Aqjoldyqtar» beınerolıkte partııa usynǵan ózgerister jáne olardyń qajettiligi týraly eske salyp, saılaýǵa belsendi qatysýǵa shaqyrdy.
