Jalpy, qaýipti derttiń taralýy kezinde el-jurttyń densaýlyǵy ǵana emes, bekem birligi de synǵa tústi. Qudaıǵa shúkir, qazaq qoǵamy bir el, bir halyq bolyp bul synǵa tótep bere bildi. Bıyl jastarymyzdy janashyrlyqqa, jaýapkershilik pen qamqorlyq jasaı bilýge úndedi. Adamgershilik qundylyqtardy joǵary baǵalaıtyn qoǵam ekenimiz anyq baıqaldy. Muqtaj jandarǵa qol ushyn berip, túrli qıyndyqtarmen birge kúresip, «Alyptyń qýaty – halyqta, halyqtyń qýaty – birlikte» ekeni sózben ǵana emes, ispen de dáleldendi.
Derekterge súıensek, bıyl volonterlikpen aınalysqandar sany 100 myńnan asypty. Júregi keń meıirban jandardyń osynshalyqty kóptigi kóńil qýantady. Janashyr azamattary kóp memlekettiń bolashaǵy da jarqyn. Bul – ózgermeıtin aksıoma. Qazirgi tańda álemniń damyǵan elderinde volonterlik úrdisi qarqyndy qanat jaıyp keledi. Máselen, AQSh-ta árbir tórtinshi adam bir ret bolsa de qoǵamdyq sharalarǵa qatysqan eken. Endi sol volonterlerdiń eńbegin aqshaǵa baǵalasaq, bir jylda amerıkalyqtar qoǵamǵa quny 193 mıllıard dollardaı paıda ákeletin kórinedi.
Volonterliktiń taǵy bir ereksheligi, sharýany jappaı atqarý oǵan jumysshy jaldaǵannan áldeqaıda jeńil. BUU volonterleri keltirgen derekterge saı, 1 mıllıard volonter tolyq merzimde jumys isteıtin 109 mıllıon adamdy almastyra alady eken. Iаǵnı volonterliktiń tıimdiligi mol. Basqalaı aıtqanda, volonterler qyzmeti barsha azamattarymyzǵa úlgi bolyp, ulttyń jańa sapasyn qalyptastyrýǵa jol ashady.
Bizdiń elde volonterlik qyzmeti birtindep órisin keńeıtip keledi. Ásirese 2020 jyldyń «Volonter jyly» dep jarııalanýy bul salaǵa tyń serpin bergeni anyq. Qazaqstan ózgeniń máselesin óz isindeı kóretin júregi keń, nıeti durys azamattardan kende emes. Bıyl barlyq aımaqta ashylǵan Volonterlerdiń front-ofısterinde kóterilgen mańyzdy bastamalar osynyń dáleli.
Máselen, «Birgemiz» jalpyulttyq bastamasy az ǵana ýaqytta kóptegen janashyr otandasymyzdy ortaq iske judyryqtaı jumyldyrdy. Jobaǵa qatysýshylar álemdi jaılaǵan indetke qaramastan, qıyn jaǵdaıǵa tap bolǵan muqtaj jandarǵa barynsha kómektesti. Osy bastama aıasynda «Qamqor», «Saulyq», «Sabaqtastyq» jobalary júzege asyrylyp, júz myńdaǵan turǵynǵa kómek kórsetildi.
Búginde tazalyq máselesi óte ózekti. Ásirese polıetılen qoqystar ár jerde shashylyp, qorshaǵan ortany lastap jatqanda onymen kúresýdiń mańyzy arta túsedi. Ekobelsendilik – sán qýý emes, shynaıy qajettilik, ómir qaǵıdaty. Elimizdegi volonterler osy baǵytta da aýqymdy jumys atqardy. О́zenderdi, ormandardy tazalaý, aǵash egý, qoqysty suryptaý jónindegi «Taza Alem» volonterlik qozǵalysynyń qyzmeti de kópshiliktiń qoldaýyna ıe boldy. Sonyń nátıjesinde tabıǵat myńdaǵan tonna qoqystan tazartylyp, keń tynys aldy.
Budan bólek, volonterler turǵyndardyń quqyqtyq saýatyn ashý maqsatynda onlaın quqyqtyq kómek kórsetti. Jan-janýarlardy qorǵaý boıynsha da keleli jetistikterge qol jetkizdi. Osy baǵyttaǵy jumysty júıeli júrgizý maqsatynda aldaǵy ýaqytta jan-janýardy qorǵaýǵa qatysty zańda eriktilerdi jumyldyrý qarastyrylmaq. Sondaı-aq Qaıyrymdylyq týraly zań jobasy ázirlenip jatyr.
Eriktilerdi jumyldyrǵan taǵy bir erekshe joba Jambyl oblysynda júzege asty. Oblys ákimi Berdibek Saparbaevtyń uıytqy bolýymen iske qosylǵan «Asarlatyp úı salý» bastamasy aıasynda óńirdegi ár aýylda bir-birden úı salynyp, muqtaj otbasylarǵa berildi. Jobanyń ereksheligi sol, oǵan oblys bıýdjetinen qarajat bólingen joq. Úı salýǵa qajetti búkil shyǵyndy aýyl turǵyndarynyń ózderi kóterdi.
Qysqasy, Volonter jylynda atqarylǵan sharýa az emes. Erikti bolý eren eńbek pen qajymas qaıratty talap etetin sala. Endigi mańyzdy másele – 2020 jyldyń aıaqtalýymen naýqanshyldyqqa salynyp, volonterlikti toqtatpaı, keleshekte bul salany odan ári órkendete túsý. Eldiktiń belgisi ıgi isti jalǵastyrýdan kórinedi.
