Qaladaǵy memlekettik etnosaıasattyń júrgizilý barysymen tanysyp, qatysýshylardyń usynys, pikirlerin tyńdaǵan shahar basshysy aldaǵy kezeńderde qalanyń ósip-órkendeý jolyndaǵy jumystardy birlese júzege asyratynyn jetkizdi.
–Táýelsizdikten keıin Qazaqstan halqy Assambleıasy Elbasynyń bastamasymen qurylǵan bolatyn. Osy ýaqytqa deıin ultaralyq tatýlyqtyń uıytqysy bolyp keldi. Elde qandaı qıyn jaǵdaı oryn almasyn etnos ókilderi birge atsalysyp keledi. Memlekettik tildi damytý jáne ony ary qaraı jańǵyrtý jolynda birlese jumys atqaramyz, -dedi qala ákimi.
Kezdesýde qaladaǵy etnosaralyq ahýal jáne qoǵamdyq kelisim men jalpyulttyq birlikti nyǵaıtý boıynsha atqarylǵan jumystar jóninde «Qoǵamdyq kelisim» mekemesiniń basshysy Erbol Baıqonaqov baıandady.
–Pandemııa ahýalyndaǵy shekteýlerdi eskere otyryp, jumys aýqymyn onlaın-formatta júrgizýge basymdyq berildi. Memleket basshysynyń «Halyq únine qulaq asatyn memleket» qaǵıdaty aıasynda qoǵamdyq dıalog alańdary quryldy. Sonymen qatar, karantın kezeńinde etnos ókilderiniń qatysýymen «Abaı oqýlary» estafetasy, «Ál-Farabı taǵylymy» tanymdyq aksııasy, «Men Týymmen maqtanamyn» chellendji, «Qalamnyń tarıhı oryndary» onlaın-saıahaty, «Memlekettik til – tuǵyrym» vebınary, «Elbasy jolymen» tanymdyq ekspedısııasy, «Táýelsizdik tabystary» leksııalary uıymdastyryldy, - dedi E.Baıqonaqov.
Búginde Shymkent qalasynda 100-den astam túrli etnos ókilderi ómir súredi. Al, Qazaqstan halqy Assambleıasynyń qaramaǵynda 16 etnomádenı birlestigi jumys jasaıdy. Qaladaǵy orta arnaýly oqý oryndarynda 29 «Dostyq» klýby ashylǵan. Sonymen qatar, mıllıondy shahardyń ulttyq quramynda qazaqtar 66,7%, ózbek 17,7%, orys 9,1%, ózge etnostar 6,5 paıyzdy qurap otyr. Qalada jyl saıyn ár etnomádenı birlestik óziniń tili men mádenıeti jáne dástúri kúnderin atap ótedi.
