Qasym-Jomart Toqaevqa ótken jylǵy saýda júıesiniń damý qorytyndylary, onyń ishinde, syrtqy jáne ishki saýdany keńeıtý jóninde qabyldanǵan sharalar jaıly baıandaldy. Kezdesý barysynda jaǵymsyz ózgeristerge qaramastan, Qazaqstannyń shıkizattyq emes eksportynyń oń dınamıkasyn saqtap qalǵany aıtyldy.
Prezıdent qazaqstandyq ónimniń eksportqa shyǵarý naryǵyn keńeıtýdiń jáne onyń básekege qabilettiligin arttyrýdyń mańyzdylyǵyn atap ótti. Bıyl Qazaqstan Eýrazııalyq ekonomıkalyq odaqqa tóraǵalyq etedi. Osy rette bizdiń elimiz eýrazııalyq ıntegrasııany damytýǵa, saýda kedergilerin joıýǵa jáne taýarlar men qyzmetterdiń erkin aınalymyn qamtamasyz etýge basa mán berip otyr.
Ishki saýda salasyna qatysty Qasym-Jomart Toqaev Baqyt Sultanovqa ulttyq taýar ótkizý júıesin qurý, naryqty otandyq ónimmen tolyqtyrý úshin jaǵdaı jasaý jáne atalǵan sektordyń ornyqty damýyn qamtamasyz etý jónindegi jumystardy sapaly ári jedel atqarýdy mindettedi. Júıe О́zbekstan, Qyrǵyzstan, Tájikstan jáne Reseıdegi kóterme-taratý ortalyqtary jelisinen turatyn eýrazııalyq taýar ótkizý jelisiniń negizi bolýǵa tıis.
Memleket basshysy Saýda jáne ıntegrasııa mınıstrine otandyq ónimdi shyǵaratyn naryqtardy keńeıtý maqsatynda Eýrazııalyq ekonomıkalyq odaq sheńberinde jáne úshinshi eldermen kooperasııalyq jobalarǵa qatysý úshin Qazaqstannyń saýda-logıstıkalyq áleýetin nyǵaıtý jóninde sharalar qabyldaýdy tapsyrdy.
