О́tken ǵasyrdyń 80-90 jyldary jalpy jurt sol kezdegi Selınogradtaǵy barlyq jaı-kúıdi, aımaqtyń tynys-tirshiligi men ólkedegi ana tilimizdiń múshkil halin, ózge de túrli problemalardy «Ana tili» gazetinde jazylǵan Jumataı Sabyrjanulynyń maqalalarynan bilip, habardar bolyp otyratyn. Oqı otyra aıyzdary qanyp, birge janyp, birge kúıip, birge marqaıatyn. Sóz qasıetine kir juqtyrmaı, adaldyqtan aınymaı, jazǵanynyń shyndyǵyna kúmán týdyrmaı, júrekpen jazyp, júrekterge jol tapqan Jumataı Sabyrjanulynyń Nur-Sultan qalasynda turǵan úıi de qazaq jeri úshin kúreste aldaspandaı jarqyldaǵan ardaqty Jumabek Táshenov kóshesinde bolypty.
Eskertkish taqtanyń ashylýynda jazýshy Jumash Somjúrek: «Jumataıǵa ornatylǵan taqtanyń Táshenovtiń kóshesinde turýynyń sımvolıkalyq úılesimi bar tárizdi. Táshenov jerdiń tutastyǵyna, soltústik aımaqtyń jatqa ketpeýine basyn tikse, Sabyrjanuly óz dáýirinde el, jer, til dep shyryldady, Táshenov ıdeıalarynyń jalǵastyrýshysy boldy».
Saltanatta sóz alǵan jazýshy Qaısar Álim: Kezinde Torǵaı oblysy ashylǵanda onyń ekonomıkalyq jáne rýhanı-áleýmettik damýyna atsalysqan qalamger keıin Aqmola óńirine kelip munda da jan aıamaı, sol baıaǵy kúreskerligimen, syndarly synynyń jebesin múlt jibermeı dóp tıgize ter tókti. Jumataıdyń sol eńbegin Safýan Sháımerdenov, Syrbaı Máýlenov, Ǵafý Qaıyrbekov syndy qazaq ádebıetiniń maıtalmandary baǵalap jazdy. Marqumnyń kózi tirisinde birneshe kitaby shyqsa, artynda qalǵan murasyn jary Ámına Mirjúsipqyzy birneshe kitap etip kópshilikke jetkizdi. Ol júrekterge Jumataıdyń kózi tirisindegideı jol taýyp jatyr», degen.
Ashylý saltanatynda qalamgerdiń baýyry Jomart Sabyrjanuly, týysy Hamıtbek Mahmutov sóz sóılep, Jumataı Sabyrjanulyn este qaldyratyn sharalar jalǵasty bolsa eken degen tilekterin aıtty.
