Mártók jastary qysqy sportqa qumar

Vedomstvo basshysy Mártók aýdanynda bolyp, mádenıet pen sport mekemelerin aralady. 2019 jyly aýdan ortalyǵynda sport mektebiniń ashylýy jasóspirimderdiń sportpen shuǵyldanýyna jol ashty. Búginde shańǵy, bıatlon, kóp saıystan jaqsy óner kórsetken osy aýdannyń balǵyn sportshylary respýblıkalyq qurama komanda qataryna alynsa, 10 jas bıatlonshy Aqtóbe qalasyndaǵy ob­lystyq olımpıadalyq rezerv mek­tebinde oqıdy. Mártók mektebiniń myqty bolýy jattyqtyrýshylarynyń arqasy. Bul jaqta keńestik zamannan jalǵasqan jattyqtyrýshylyq mektep ákeden balaǵa, ustazdan shákirtke sabaqtasyp keledi. Bir kemshiligi zamanaýı sport mektebiniń bolmaýy, sport jabdyqtarynyń eskiligi bolatyn. 160 orynǵa arnalǵan dene shynyqtyrý-saýyqtyrý kesheni salynǵaly aýdan jastary birneshe sport túrimen shuǵyldana bastady. Bul jerde 50-den astam bala sýǵa júzýmen de aınalysady. Basseın esigi senbi, jeksenbi kúnderi múmkindigi shekteýli jáne kóp balaly otbasylardyń balalary úshin ashyq ári jattyǵý tegin. Sport kesheninde jumys isteıtin jattyqtyrýshylar sany artqan. Olardyń eńbekaqysy jóninde suraǵan mınıstr «Jattyqtyrýshylar men sport nusqaýshylary bazalyq aılyq eseptiń 100 paıyzdyq deńgeıinde eńbekaqy alýy kerek», dep tapsyrma berdi. О́ıtkeni, aqyly negizde jumys isteıtin sport seksııalarynan túsken tólemniń qandaı da bir bóligi jattyqtyrýshylarǵa berilýi qajet.

Qysqy sport túrleri jaqsy qar­qynmen damyp jatqan Mártók aýda­nynyń aýyldyq okrýgterinde de bu­qaralyq sport túrlerin damytý jos­parǵa engizilgen. Bıyl jazdan bastap Sarjansaı, Qaratoǵaı, Rodnıkovka eldi mekenderinde sport zaldary, Sa­ryjar, Jaısań eldi mekenderinde angar túrindegi sport keshenderi salynatyn boldy.

Mádenıet jáne sport mınıstri Aq­toty Raıymqulova men óńir basshysy Ońdasyn Orazalın aýdandyq kitaphana qoryn aralap, aýdandyq mádenıet úıinde qolónershi Erqosaı Ábilov pen aǵash ustasy Edilbaı Uzaqbaevtyń kór­mesimen tanysty. 1976 jyly salynǵan Mártók aýdandyq mádenıet úıi ótken jyly «Jumyspen qamtýdyń jol kartasy» baǵdarlamasy aıasynda kúrdeli jóndeýden ótti. Bıýdjetten bólingen 145,8 mln teńge qarjyǵa jóndeý ju­mystaryn «KND Construction» JShS-i júrgizdi. Qurylysqa Mártók aýdanynyń 21 jumyssyz turǵyny tartylǵan. Qazir 460 orynǵa keńeıtilgen Mádenıet úıinde 18 úıirme jumys isteıdi. Bul jerde mınıstr men óńir basshysy aýyl klýb­tarynyń jetekshilerimen kez­desip, eldi mekenderdegi mádenıet oshaq­tarynyń qazirgi jaǵdaıy týraly áńgimelesti.

Osydan keıin A.Raıymqulova Aqtóbe qalasyndaǵy Qysqy sport túrlerine arnalǵan oblystyq mamandandyrylǵan balalar men jasóspirimder mektebine baryp, jattyqtyrýshylar men tár­bıelenýshilermen kezdesip, Kirpishti eldi­ mekenindegi uzyndyǵy 11,5 shaqy­rym bolatyn rolıkti shańǵy jolynyń ashylýyna qatysty. Sapar sońynda mınıstr Aqtóbedegi oblystyq fılar­monııa ǵımaratynda mádenıet qyzmet­ker­lerimen kezdesti.

Aqtóbe oblysy