2020 jyly óńirde qurylys jumystary jańa qarqyn aldy. 1000-nan astam kópbalaly jáne az qamtylǵan otbasy qonys toıyn toılady. Bul turǵydaǵy jumystar osymen toqtap qalmaı bıyl da jalǵasyn tappaq.
Danıal Ahmetovtyń aıtýynsha, barlyq qarjylandyrý kózderi esebinen 912,5 myń sharshy metr turǵyn úı salý josparlanyp otyr. Onyń ishinde jeke ınvestorlardyń qarajatyna kópbalaly jáne az qamtylǵan otbasylarǵa arnalǵan 1143 páterlik 759 birqabatty úı salynady.
«Barlyq jumystar ýaqytyly jáne sapaly oryndalýy qajet. Ákimder úılerdiń aýmaǵyn abattandyrýdy bekitilgen keste boıynsha júrgizýi tıis. Sondaı-aq qurylys kompanııalarynyń básekelestik ortada jumys isteýine jaǵdaı jasaý kerek. Eger aýdandar jeke ınvestorlar esebinen nesıelik turǵyn úı salýdy qolǵa alsa, onda olarǵa áleýmettik turǵyn úı salý josparynan kóbirek kvota beriledi», dedi aımaq basshysy.
Bıyl toǵyz áleýmettik-mádenı nysannyń qurylysy jalǵasady. Atap aıtqanda, Semeı qalasy Stepnoı kentindegi 300 oryndyq mektep, Qaınar, Bozanbaı, Tavrııa, Marqakól, Aqsýat aýyldary men Serebrıansk qalasynda sporttyq-saýyqtyrý kesheni salynady.
Sondaı-aq basseıni bar osyndaı keshen Borodýlıha aýdanynda da boı kóteredi. Al Kókpekti aýdany Samar aýyly men Aıagóz qalasynda basseın, О́skemende 244 oryndyq 9 qabatty jataqhana salynýda.
