Keshe «Astana – jańa qala» erkin ekonomıkalyq aımaǵynda (EEA) áskerı jáne azamattyq maqsattaǵy arnaıy tehnıkalar shyǵaratyn jańa zaýyttyń alǵashqy qadasyn qaǵý rásimi bolyp ótti. Astana qalasynyń ákimi Imanǵalı Tasmaǵambetov pen Qorǵanys mınıstri Ádilbek Jaqsybekov bolashaq zaýyttyń irgetasyna arnaıy kapsýl saldy.
Keshe «Astana – jańa qala» erkin ekonomıkalyq aımaǵynda (EEA) áskerı jáne azamattyq maqsattaǵy arnaıy tehnıkalar shyǵaratyn jańa zaýyttyń alǵashqy qadasyn qaǵý rásimi bolyp ótti. Astana qalasynyń ákimi Imanǵalı Tasmaǵambetov pen Qorǵanys mınıstri Ádilbek Jaqsybekov bolashaq zaýyttyń irgetasyna arnaıy kapsýl saldy.
Atalmysh joba sheńberinde 2015 jylǵa qaraı «Astana – jańa qala» EEA-ǵa kiretin Indýstrııalyq park aýmaǵynda jylyna 120-dan 360-qa deıin brondalǵan dóńgelekti mashına shyǵaratyn tehnologııalyq keshen salý josparlanyp otyr. «Qazaqstan ınjınırıng» ulttyq kompanııasy» AQ, «Qazaqstan ınjınırıng Dıstrıbıýshn» JShS jáne «Paramaýnt grýpp» kompanııasy (OAR) aǵymdaǵy jylǵy qarasha aıynda Qazaqstanda áskerı dońǵalaqty mashınalar shyǵarý óndirisin salý jáne olarǵa tehnıkalyq qyzmet kórsetý týraly memorandýmǵa qol qoıǵan bolatyn.
Bul joba Ortalyq Azııada alǵash ret qolǵa alynyp otyr. Sondaı-aq, ol qorǵanys jáne mashına jasaý ındýstrııasyn sapaly ilgerileýshilikti qamtamasyz etetin tabysy joǵary birlesken kásiporyn qurýǵa múmkindik beredi. Zamanaýı robottandyrylǵan qurylǵylar mundaı jumystardyń tolyq sıklin, brondy temir taqtaılardy kesý men dánekerleýdi, mashınalardy syrlaý men jınaýdy, sapaly shyǵý baqylaýlaryn júrgizýdi iske asyrady. Zaýytta tek áskerı tehnıkalar óndirisi ǵana emes, sonymen qatar, qalalyq avtobýstar shyǵarý da qarastyrylǵan.
Jańa zaýyt iske qosylǵan kezde onda shyǵarylatyn mashınalardyń 50 paıyz qosalqy bólshekteri men agregattary Qazaqstanda jáne Keden Odaǵy elderi aýmaǵynda óndirilýi tıis. Sonymen birge, jańa zaýytta 150-den astam jumys ornyn ashý, 50-den astam ınjenerler men tehnıkalyq jáne tehnologııalyq saladaǵy mamandardy Qazaqstan men shetelderde oqytý qarastyrylǵan. Zaýytta konstrýktorlyq bólim men qyzmet kórsetý ortalyǵynyń bolýy tapsyrys berýshiniń talaptaryna sáıkes mashınalarǵa odan ári jańǵyrtýlar júrgizý men tehnıkalyq qyzmet kórsetýge múmkindik beredi.
Zaýyttan shyǵarylatyn barlyq tehnıkalar Qazaqstannyń óńirlerine jáne jaqyn shetelderge taratýǵa múmkindik beretin halyqaralyq standarttarǵa sáıkes bolady. Qazaqstanda óndirýge usynylyp otyrǵan brondalǵan dóńgelekti mashınalar barlyq kórsetkishteri boıynsha óz sanatynda úzdikterdiń biri bolyp tabylady. Aǵymdaǵy jylǵy mamyr-maýsymda atalmysh tehnıka túrleri Qazaqstan Qorǵanys kúshteriniń áskerı bólimsheleriniń túrli polıgondarynda jan-jaqty synaqtan ótkizildi.
Qazir Indýstrııalyq park aýmaǵynda jalpy ınvestısııa kólemi 181 mlrd. teńge bolatyn 49 joba tirkelgen. Onyń ishinde jalpy ınvestısııa kólemi 44 mlrd. teńgeni quraıtyn 11 óndiris 2009-2012 jyldary iske qosyldy. Bul kásiporyndar qyzmet isteı bastaǵan jyldar ishinde 197 mlrd. teńgeniń ónimderi shyǵaryldy jáne qyzmeti kórsetildi. Kásiporyndar jumys isteı bastaǵan kezeńde 18 mlrd. teńge, onyń ishinde 2013 jyly 8 mlrd. teńge kólemindegi salyqtar men salyq tólemderi tústi. 1718 jańa jumys orny ashyldy.
Jylqybaı JAǴYPARULY,
«Egemen Qazaqstan».
Sýrette: bolashaq zaýyttyń qurylys alańyna kapsýl salý.
Sýretterdi túsirgen
Erlan Omarov.
