Aýyl mektebinde alǵashqy áskerı daıyndyq páninen sabaq beretin Asylanbek Mýsauly qaradomalaqtardy bylǵary qolǵap ónerine baýlyp júrgenine de on jyl bolyp qalypty. Aýyl mektebiniń jertólesinde – tóbesi tapal, terezesi joq, edeni topyraq qýysta júrip, jarqyraǵan jattyǵý zalyn, jaraǵy saıly rıngti ańsaıtyn. Biraq ol oıynyń júzege asýy ońaı emes-tin. Osyndaı ótinishpen talaı esikti qaǵyp, talaı dókeıdiń aldynan óttim deıdi jattyqtyrýshy.
Aýyldaǵy boks zalyn asarlatyp salyp alý ıdeıasyna jan bitirgen – osydan bir jyldan asa ýaqyt buryn aýdan tizginin ustaǵan Albert Esalıev eken. Ol Asylanbek Sarmalaevtyń usynysyn qyzý qoldap, jergilikti bılik oryndary tarapynan da barynsha kómek kórsetýge ýáde bergen. Buǵan aýyl sportyn damytyp júrgen azamattyń shynaıy yqylasy, shákirtteriniń jetistikteri de áser etse kerek.
Osylaısha, 2020 jyldyń aqpan aıynda naqty is bastalyp ta ketti. Eńbek ardageri, erterekte aýylǵa basshylyq etken Tasqalı Ilııasov aqsaqal qaramaǵyndaǵy bos turǵan ǵımaratty syıǵa tartty.
Biraq bul «ǵımarattyń» qalqıǵan 4 qabyrǵasynan basqa jaramdy jeri az edi. Asylanbek aýyldyń atpal azamattarynyń, kásipkerlerdiń aldynan ótti. Osy Bostandyqta týǵan, búginde ár jerde júrgen jerlester de qarap qalmady. Sóıtip, Bostandyqta boks zalyn ashý – bir qaýym jurttyń basty maqsatyna aınaldy. Shalǵaıdaǵy aýylda qolǵa alynǵan is-shara astanadaǵy «Batyr bolamyn» atty qaıyrymdylyq qordyń da nazaryna ilinipti. Osylaısha, aýyl muǵaliminiń júreginen shyqqan ushqyn birte-birte talaı jannyń júregin jylytqan, yqylasyn ysytqan jalynǵa aınaldy.
– On bir aı boıy kúni-túni osy istiń basy-qasynda júrdim. Bul bastamaǵa úles qosqan, qoldaý bildirgen jandar óte kóp. Sonyń ishinde aýylymyzdyń azamaty Abzal Nuǵmanov degen aǵamyz jalǵyz ózi 6 mln teńgedeı qarjysyn berdi. Nurlan Nuǵmanov, Aıdynbek Ábıtov, Ádilbek Ǵazızov, Qaırat Bekmuhambetov sekildi jerlesterim úlken úles qosty. Odan bólek 100-200 myń teńgeden ortaǵa salǵan atymtaı azamattar bar. Tehnıkamen kómektesken, tipti qol kómegin kórsetken jandar da jeterlik. Jergilikti bıýdjetten de qarajat bólindi. Bostandyqtaǵy boks zaly – birliktiń, baýyrmaldyqtyń belgisindeı bolǵan bastama, – deıdi Asylanbek Sarmalaev.
О́zi týraly sarań sóılegenimen, eń basty eńbek Asylanbek Mýsaulyna tıesili ekenin aýyldastary jaqsy biledi. Sodan da bolar, 2021 jyldyń basynda boks zalynyń saltanatpen ashylý kezinde kásipker Abzal Nuǵmanov aýyldastar atynan alǵys aıtyp, bapkerge sáıgúlik mingizdi.
Árıne, ustazdyń jetistigi shákirti shyqqan shyńmen ólshenedi ǵoı. Bostandyqtyń buǵan deıin jertólede jattyqqan jas bokshylary arasynan talaı daraboz shyǵypty. Qazirdiń ózinde Asylanbek baptaǵan balalardyń 6-ýy – sport sheberliginen úmitker atanǵan. Al Turarbek Qalıev – jasópirimder arasynda Qazaqstan chempıony bolsa, Sanjar Marksov osy ataqty eki dúrkin jeńip alǵan! Halyqaralyq jarystarda da jeńimpaz atanǵan jastar ósip keledi.
– Endigi armanym – alaqandaı aýyldan Azııanyń, álemniń, tipti olımpıadanyń chempıondary shyqsa deımin, – deıdi Asylanbek.
Osy istiń uıymdastyrý jumystaryna óz erkimen jegilgen volonter, «Batyr bolamyn» qaıyrymdylyq qorynyń úılestirýshisi, Oraldaǵy «О́z ómirimniń ıesimin» atty trenıng tobynyń múshesi Ádemi Márlenqyzynyń aıtýynsha, Bostandyqtaǵy boks zalynyń qurylysy men jasaqtalýyna barlyǵy 21 mln teńgedeı qarajat ketken. Onyń edáýir bóligi qaıyrymdylyq qorynyń esepshotyna túsken qarjy eken. Qor prezıdenti Arman Ýahap bul qarjyǵa sapaly sporttyq snarıadtardy arzandaý baǵamen alýǵa kómektesken.
Boks zalynyń ashylý saltanatyna Qaztalov aýdanynyń ákimi Albert Esalıev, Batys Qazaqstan oblysynyń dene shynyqtyrý jáne sport basqarmasynyń basshysy Qaımen Esendııarov sekildi laýazymdy tulǵalar da qatysyp, aýyl azamattarynyń qýanyshyn bólisti. Jańa zaldyń qajetti quraldary syı-sııapatpen túgendelip, kásibı rıng, yńǵaıly sporttyq kıimder, boks qaptary, rezına tósenishteri tartý etildi.
Qaztalov aýdany – bokstan Olımpıada chempıony atanǵan Danııar Eleýsinovtiń týǵan jeri. Sondyqtan bostandyqtyq jas boksshylar boı túzep, úlgi alatyn tulǵa joq emes.
Búginde Bostandyq aýylyndaǵy jańa sport zalynda boks jáne dzıýdo úıirmeleri jumysqa kirisip te ketti. Asylanbek Sarmalaevtyń ózi jattyqtyratyn topta 30 bala bar. Aýylda smartfonǵa jipsiz baılanyp, bos-bolbyr otyrý sán emes. Osynyń bári jalǵyz adamnyń jigerine, janqııarlyǵyna baılanysty.
Al balalar bapkeri Asylanbek Mýsauly bolsa, «bárin el istedi» dep otyr. «Elimizde aýyzbirshilik bolsa, almaıtyn asý, jetpeıtin maqsat bolmaıdy eken, soǵan kózim jetti» dep qoıady jaı ǵana.
Batys Qazaqstan oblysy
