– Abaı obrazy arqyly búkil eldiń bolmysy men minezin tanytýǵa umtyldyq. Qazaqtyń izgi qasıetimen qatar etekbasty eski minezin de kórsetkimiz keldi. Sol zamannan beri ózgermegen osy bolmysty boıamasyz baıan etýge tyrysqan talpynysymyzǵa qazylar oń baǵa berdi, – deıdi rejısser.
Jalpy, jastar teatry tek megapolısterde ǵana bolady degen túsinik bar bizde. Talapty tolqynnyń basyn qosqan Syrdaǵy óner ujymy osy oıdyń kóbesin sógip, ortalyqtan shetkeri jatqan aımaqtarda da keıingi tolqynnyń shyǵarmashylyǵyn shyńdaýǵa bolatynyn kórsetti.
Shyǵarmashylyq ujym osydan 5 jyl buryn úıirme negizinde qurylǵan. Sahna shymyldyǵyn dramatýrg Qaırat Júnisovtiń «Alǵashqy mahabbat» pesasymen túrgen kezde jastar, tipti aılyqsyz jumys istegen eken. Joǵarǵy oqý ornyn, M.Mámetova atyndaǵy Qyzylorda pedagogıkalyq joǵarǵy kolledjiniń akterlik bólimin bitirgen talantty jastar tobynyń talabyn baıqap, jańa teatr jumysynyń jolǵa túsip, óner kóshine qosylýyna qala ákimi Nurlybek Nálibaev kóp qoldaý tanytypty. On úsh shtattyq birlik taýyp berip, A.Toqmaǵambetov atyndaǵy qalalyq mádenıet úıinde trýppanyń shyǵarmashylyqpen alańsyz aınalysýyna jaǵdaı jasap berdi.
Bes jyldyń bederinde óner ujymy kórermen nazaryna Aıjan Atymtaevanyń «Qyz-qasqyr», Baıdildá Aıdarbekovtiń «Nege?» jáne Sultanáli Balǵabaevtyń «Qyzylordanyń qyzdary» pesalaryn usynypty. Qazir osy teatrdan tájirıbe jınaǵan jastardyń birqatary N.Bekejanov atyndaǵy oblystyq drama teatryna qabyldandy. Kınoǵa túsip, elimizdiń ár qıyryndaǵy kórermenge tanylyp jatqandary da bar.
Teatr jetekshisi, rejısser Ońtalap Nurmahanov iriktelgen shyǵarmalardy qoıylymǵa laıyqtap, avtorlaryna shama-sharqynsha qalamaqy da tólenip otyr. Al týǵan óńirindegi jaqsy iske únemi qulaǵy túrik júretin qalamger Sultanáli Balǵabaev jastar teatryna «Qyzylordanyń qyzdary» pesasyn syıǵa tartypty.
– Byltyr «Qazaqstan Respýblıkasynyń keıbir zańnamalyq aktilerine mádenıet, dene shynyqtyrý jáne sport máseleleri boıynsha ózgerister men tolyqtyrýlar engizý týraly» zańǵa qol qoıyldy ǵoı. Muny eń aldymen shynaıy ónerdi qoldaý dep túsingenimiz jón, – deıdi qalalyq mádenıet jáne tilderdi damytý bóliminiń basshysy, belgili aıtysker aqyn Muhtar Nııazov.– Baıqasańyz, osy kúni teatrǵa baratyndardan, kınony úıden emes, zaldan baryp kórgisi keletinder kóp. Mysaly, osy ujym alǵashqy qoıylymnan-aq kórermenin tapqan teatr qatarynda. Bıyl bul ujym bizdiń bólimge qarasty mekeme retinde óz aldyna bólinip shyǵady. «Bir qalaǵa eki teatr kóptik etpeı me?» deıtinder de tabylar. Bul jerde kórermen tańdaýyn eskerýimiz kerek. О́nerdi báseke ósiretinin de esten shyǵarmaıyq. Qazir qos teatr bir-birin qamshylap, qatar shaýyp kele jatyr. Jýyrda oblysqa kelgen saparynda Mádenıet jáne sport mınıstri Aqtoty Raıymqulova jas ujymnyń tabysyn joǵary baǵalap, rızashylyǵyn bildirdi.
Qyzylorda – talaı óner ujymdarynyń tarıhy bastaý alǵan óńir. Qazirgi M.Áýezov atyndaǵy Qazaq memlekettik akademııalyq drama teatrynyń negizi osynda qalanyp, alǵashqy qoıylymy 1926 jyly 13 qańtarda boldy. Kópke deıin Syrdaǵy tuńǵysh teatr trýppasynyń áýelgi sahnalaǵan spektakli Muhtar Áýezovtiń «Eńlik-Kebek» pesasy sanalyp kelgen. Keıinnen óner ujymynyń tarıhyn zerttegen ǵalymdar birinshi qoıylymnyń Qoshke Kemeńgerovtiń «Altyn saqasy» ekendigin taıǵa tańba basqandaı dáleldep, osy tujyrymǵa qazyq baılatty. Qazirgi koreı mýzykalyq drama teatry artısteri de 1937 jyly osy Qyzylordada alǵash ret kórermender aldyna shyqty. Uzaq jyl osy óńirde turaqtaǵan óner ujymy keıin Almatyǵa qonys aýdarǵan.
Qyzylorda oblystyq drama teatry ujymy da Jetisýdan kóship kelgen 1960 jyly dál osy mádenıet úıinde óner kórsetipti. Keıinnen Nartaı Bekejanov esimin ıelenip, qazirgi ǵımaratyna qonys aýdardy.
Talaı tarlandardyń izi qalǵan osy sahnada endi jastar teatry qadam basyp jatyr. Bul jas ujymnyń ónerdegi kóshi uzaq bolaryn bildirgen jaqsy yrym ispettes. Laıym, solaı bolǵaı!
Qyzylorda
