Aqar-shaqar shyńdardyń baýraıynda oryn tepken ortalyq almaly shaharǵa atbasyn burǵan týrısterdi de tánti eteri anyq. Tańǵy jupardy tamsana jutyp, tabıǵatpen úndese demalýdy qalaıtyn almatylyqtar senbi-jeksenbi kúnderi osy mańdy betke alatyn bolǵan. Munda taý sportyna arnalǵan túrli buıymdar satyp alyp, arnaýly terassalarda tamaqtanýǵa da bolady.
«Sońǵy jyldary qala turǵyndary men qonaqtarynyń taýly aımaqqa qyzyǵýshylyǵy artyp keledi. Ony osynda kelip demalýshylardyń kóptiginen baıqaımyz. Qala ákimdigi ekotýrızmdi damytý maqsatynda túrli jobalardy iske asyryp otyr. Búgingi paıdalanýǵa berilgen vızıt-ortalyq – sonyń dáleli. Sońǵy 5 jylda qyzmet kórsetý sapasy bıik satyǵa kóterildi. Sonyń nátıjesinde qys mezgilinde kórshi elderden Almatyǵa aǵylatyn týrıster sany da edáýir artyp otyr», deıdi áýesqoı alpınıst Bekzat Nurymetov.
Aty jaman indetten arylyp, qalypty ómirge qadam basýdy tilep otyrǵan el turǵyndary es jıyp, etek jıǵan soń jańa saparlar men saıahattar týraly tolǵanýy – qalypty nárse. Degenmen álemdegi epıdemııalyq ahýal alys-jaqyn shetelderge saıahattaý jaıyn keıinge shegereri sózsiz. Sondyqtan jospardy tek ishki týrızmge qatysty qurýǵa bolatyny ras. Mamandardyń pikirinshe, qys maýsymy bastalǵaly beri ishki týrızmge suranys arta túsken. Bul rette jyl saıyn 4,5 mıllıonǵa deıin týrıst tartýǵa qabiletti, eldegi eń úlken týrıstik áleýeti bar Almaty taý klasteri sheteldik qonaqtar men otandastarymyzǵa taptyrmas demalys naýqanyn usynyp otyr.
ALMATY
