Degenmen áli de ótken jyldardan beri úsh mekemeniń 23 jumysshyǵa 6,5 mln teńge eńbekaqy bereshegi qalyptasyp otyr. Osyǵan baılanysty zań buzýshylyqtardy joıý týraly uıǵarym berilip, laýazymdy tulǵalar ákimshilik jaýapkershilikke tartyldy. Al mekeme basshylaryna qatysty quqyq qorǵaý organdary Qylmystyq kodekstiń 152-babynyń 3-bóligine saı qylmystyq is qozǵaǵan. Alaıda qylmys quramynyń bolmaýyna baılanysty toqtatylǵan.
Jumysshylarǵa jalaqyny ýaqtyly tólemeı, zar jylatyp otyrǵan kompanııanyń biri – «Gruppo RF Kazakhstan» JShS. Bul kompanııa qurylys salasyndaǵy árleý, dánekerleý sekildi jumystardy atqarýmen aınalysady. Osynda jumys isteıtin qyzmetkerler byltyrǵy qarashadan beri tólenýi tıis jalaqyǵa qol jetkize almaı júr. Olar jalaqynyń keshiktirilý sebebin bilý úshin kompanııanyń keńsesine birneshe márte jınaldy. Alǵash ret 40-qa jýyq qyzmetker byltyrǵy 18 qarashada dabyl kóterdi. Sol kezde bul máselege oblystyq memlekettik eńbek ınspeksııasy basqarmasynyń ınspektorlary aralasty. Sonda kompanııanyń byltyrǵy qazanda 85 jumyskerge 10 mln teńge mólsherinde jalaqy bereshegi bary anyqtaldy. Biraq jalaqy qaryzy 18 qarashaǵa deıin tólengen joq. Sondyqtan kompanııa qyzmetkerleriniń bir toby basqarmaǵa ótinish jasap, qazan aıynda jalaqynyń ýaqtyly tólenbegenin kórsetip bergen.
– Basqarma ınspektorlary kompanııa basshylarymen kezdesip, jalaqyny keshiktirý Eńbek kodeksine qaıshy ekenin túsindirdi. Sodan soń kompanııa tarapynan 19 qarashada 10 mln teńge mólsherindegi jalaqy bereshegi tolyq kólemde óteldi. Al qyzmetkerler buryn bergen ótinishin keri qaıtaryp alǵan edi, – deıdi basqarma basshysynyń orynbasary Dýman Ábıev.
Alaıda «Baıaǵy jartas – bir jartas» degendeı, «Gruppo RF Kazakhstan» JShS-niń basshylary jumysshylaryna jalaqyny taǵy keshiktire bastady. Taǵy da derekke súıensek, byltyrǵy jeltoqsanda jalaqy qaryzy 20 mln teńgeden asty. Sóıtip kompanııa men jumysshylar arasyndaǵy jalaqy daýy qaıta órbidi.
– Daýdy sotqa deıin retteý maqsatynda ótken jylǵy 21 jeltoqsanda kompanııanyń 40 qyzmetkeri men jumys berýshi kompanııa basshysy Rıv Kembrıno Valter arasynda medıatıvtik kelisim jasaldy. Onda jumys berýshiniń 20 jeltoqsanda qyzmetkerlerge qarasha-jeltoqsan aılary úshin jalaqy boıynsha bereshekti, sondaı-aq 2020 jyly paıdalanylmaǵan eńbek demalystary (eseptelgen) úshin ótemaqyny tóleýge kelisti. Taraptardyń kelisimimen mindettemelerdi oryndaý merzimi 25 jeltoqsanǵa deıin uzartyldy, – deıdi Dýman Ábıev. – Medıatıvtik kelisimniń 1-tarmaǵynda taraptar «Gruppo RF Kazakhstan» JShS qyzmetkerlerine jalaqyny ýaqtyly tólemeý» daýy boıynsha medıasııa rásimin «Astana» halyqaralyq tórelik ortalyǵynyń tórelik jáne medıasııa qaǵıdalarymen aıaqtaıtyny kózdeldi.
Baıaǵynyń úlkenderi «Ýáde – Qudaı aty» deýshi edi. Alaıda jumys berýshi ýádesinde turmady. Oǵan kompanııanyń medıatıvtik kelisim boıynsha mindettemesin oryndamaǵany dálel bolyp otyr. Endi medıatorlar qyzmetkerlermen birlesip sotqa berý úshin talap-aryz daıyndaýǵa kiristi. Buǵan qosa byltyrǵy 28 jáne 29 jeltoqsanda basqarmaǵa kompanııanyń burynǵy 29 jumyskerinen 2020 jylǵy qarasha-jeltoqsan aılaryna jalaqy tólenbegeni týraly ótinish tústi.
Shyndyǵynda bul kompanııada alańdatarlyq ahýal qalyptasty deýge bolady. О́ıtkeni otbasyn asyraý úshin mańdaı terin tógip jumys istegen jumysshylarǵa jalaqy tóleýdi saǵyzdaı sozýǵa bola ma? Biraq bir basynda birneshe nesıesi bar jumysshylardyń janaıqaıy jumys berýshini oılandyrmaıtyn sekildi. Sol sebepten eki jáne odan kóp adamǵa eńbekaqynyń tólenbeýi qyzmetkerlerdiń konstıtýsııalyq quqyǵyn buzatyny eskerilip, Atyraý oblysy ákiminiń ókimimen «Gruppo RF Kazakhstan» jaýapkershiligi shekteýli seriktestigine jospardan tys tekserý júrgizý týraly sheshim qabyldandy. Osyǵan oraı oblystyq memlekettik eńbek ınspeksııasy qyzmetkerlerdiń ótinishimen atalǵan kompanııaǵa jospardan tys tekserý júrgizýdi bastady.
– Eńbek zańdylyǵyna qatysty buzýshylyqtar anyqtalǵan jaǵdaıda kompanııa basshylyǵyna ony joıý týraly tıisti nusqama beriledi. Kompanııa basshylary Ákimshilik quqyq buzýshylyq týraly kodekstiń 87-babynyń 1-bóligimen ákimshilik jazaǵa tartylady, – deıdi basqarma basshysynyń orynbasary Dýman Ábıev.
Atyraý oblysy
