Tártip saqshysyna qatysty kúsh qoldanǵan azamat 5 jylǵa sottaldy

Qoǵam • 21 Qańtar, 2021

Tártip saqshysyna kúsh qoldanǵan azamat 5 jylǵa sottaldy

28 ret kórsetildi

Aqmola oblysynda bılik ókiliniń zańdy talaptaryna baǵynbaı, kóligimen polısııa qyzmetkerin soǵyp, kúsh qoldanǵan azamat 5 jylǵa bas bostandyǵynan aıyryldy, – dep habarlaıdy Egemen.kz Polisia.kz. saıtyna silteme jasap.

Marzhan Tileubekova

Esterińizge sala keteıik, 2020 jyldyń 14 aqpanynda saǵat 15:00-de “Ekaterınbýrg-Almaty” avtojolynyń 917 shaqyrymynda ornalasqan Jaqsy aýdany Jaqsy kentiniń mańynda “Qaýipsiz jol” jedel-aldyn alý is-sharasyn ótkizý barysynda Aqmola oblysy PD PPB 4-vzvodynyń ınspektorlary “Chevrolet Aveo” markaly avtokóligin toqtatqan. Kólik tizgininde otyrǵan Jaqsy kentiniń 24 jastaǵy turǵyny bolyp shyqty.

Keıin belgili bolǵandaı, er adam Jaqsy aýdandyq sotynyń úkimimen alkogoldik jáne esirtkilik masań kúıde kólik júrgizgeni úshin kólik basqarý quqyǵynan úsh ret aıyrylǵan.

Polısııa qyzmetkerleri ákimshilik quqyq buzýshylyqtyń jolyn kesý jáne adamdardyń ómiri men densaýlyǵyna tikeleı qaýiptiń aldyn alý úshin quqyq buzýshyny Jaqsy aýdanynyń polısııa bóliminiń ǵımaratyna jetkizdi.

Polısııa bóliminiń ǵımaratynda polısııa qyzmetkeri er adamǵa qatysty kólik kuralyn basqarý quqyǵynan aıyrylǵan adamnyń kólik basqarý deregi boıynsha ákimshilik quqyq buzýshylyq týraly hattama toltyrǵan.

Hattama toltyrý barysynda “Chevrolet Aveo” markaly avtokóliginiń Arshaly aýylynyń 40 jastaǵy turǵynyna tıesili ekeni anyqtaldy. Sondaı-aq, onyń kóligin ápkesine senip tapsyrǵany belgili boldy.

Er adamnyń buryn kólik quralyn basqarý quqyǵynan aıyrylǵandyǵyn, avtomobıldiń menshik ıesi emes ekenin jáne ózimen birge kólik quralyna arnalǵan tirkeý jáne zańnamada belgilengen ózge de qujattary joq ekenin eskere otyryp, tártip saqshylary QR ÁQBtK-niń 785-babynyń, 796-babynyń, 797-baby birinshi bóliginiń 1) tarmaqshasynyń talaptaryn basshylyqqa ala otyryp, ákimshilik quqyq buzýshylyq týraly is boıynsha is júrgizýdi qamtamasyz etý sharalaryn qabyldap, ony kólik quralyn basqarýdan shettetý týraly hattama toltyrdy.

Odan keıin polıseıler ýaqytsha saqtaý úshin arnaıy turaqqa ornalastyrý maqsatynda “Chevrolet Aveo” avtokóligin alý aktisin toltyra bastaǵan.

Qaskúnem osy sátte “Chevrolet Aveo” avtokóliginiń kiltin alyp, polısııa bóliminiń ǵımaratynan kóshege shyǵyp, ǵımarat aldynda turǵan avtokóliktiń róline otyrǵan.

Kólikke qaraı júgirgen polısııa qyzmetkeri júrgizýshiniń esigin ashýǵa tyrysqan, alaıda esik ishinen qulyptalǵandyqtan, asha almaǵan.

Quqyq buzýshyny toqtatý jáne onyń kólik basqarýyna jol bermeý úshin polısııa qyzmetkeri kóliktiń aldyna shyqqan. Er adam polısııa ınspektoryn aınalyp ótý jáne toqtatý boıynsha áreket jasamaı, kóligimen polısııa qyzmetkerin qaǵyp, dene jaraqatyn keltirgen. Soqqy saldarynan polısııa qyzmetkeri avtokóliktiń kapotyna qulaǵan.

Osylaısha, qaskúnem polısııa qyzmetkerleriniń zańdy talaptaryna baǵynbaı, qarsylyq kórsetken. Olarǵa qarsy bylapyt sózder aıtqan. Saraptama nátıjeleri boıynsha onyń marıhýana tutynǵany anyqtaldy.

Eń qyzyǵy, quqyq buzýshy bolyp jatqannyń bárin uıaly telefonynyń kamerasyna túsirip otyrǵan. Onyń ústine, ol tipti ustaý kezinde de túsirýdi toqtatpaǵan.

Atalǵan fakt boıynsha sot sheshimimen 24 jastaǵy azamat QR QK-niń 380-baby (Bılik ókiline qatysty kúsh qoldaný), 378-baby (Bılik ókilin qorlaý) boıynsha kináli dep tanylyp, bes jylǵa bas bostandyǵynan aıyryldy.