Jasóspirim mundaı ataqqa jaqynda «Bilim órkenıeti» ulttyq ınnovasııalyq zertteý ortalyǵy uıymdastyrǵan respýblıkalyq baıqaýda ıe boldy. Ranonanyń «Meniń bolashaq mamandyǵym» atty esse baıqaýǵa qatysqan eńbekterdiń arasynan úzdik shyǵyp, 1-oryn aldy. Al jeńimpaz oqýyshynyń essesi «Qazaqstannyń 100 daryndy oqýshysy» kitabyna engizildi. Ranonanyń ózi talanty men kóshbasshylyq qyry úshin arnaıy sertıfıkatpen marapattalyp, keýdesine «Daryndy oqýshy» tósbelgisin taqty.
Bul Ranonanyń alǵashqy jetistigi emes eken. Buǵan deıin ol birneshe baıqaýda top jaryp, úzdik atanǵan. Mysaly, 2018 jyly ol oblystyq «Bala álemi» shyǵarmashylyq baıqaýynda, «Uly dala urpaǵy» respýblıkalyq festıvalinde júldeger boldy. Sondaı-aq, sol jyly «Sheksiz matematıka» dúnıejúzilik olımpıa jarysynda II oryn alǵan. Al 2019 jyly respýblıkalyq «Zerde» ǵylymı jobalar baıqaýynyń jeńimpazy atansa, izin ala «Qazaqstan kúlli túrki halyqtarynyń qasıetti «Qara shańyraǵy» atty halyqaralyq baıqaýynyń gran-prı júldesin ıelenipti.
Ranona bolashaqta omartashy bolyp, bal arasyn ósirýdi armandaıdy eken. Oqýshy qyz byltyr Jetisýdyń bal arasyn ósiretin aımaqtaryna arnaıy baryp kóripti. Osy saparynda omartashylardyń áńgimesin tyńdap, baldyń qundy qasıetterin, onyń adamǵa tıgizetin paıdasyn, quramy men negizgi túrlerin zerttedi.
- Men bal arasy týraly kóp izdenip júrmin. О́z bolashaǵymdy ara sharýashylyǵymen baılanystyrǵym keledi. О́ıtkeni, maǵan aralardy baqylap, zerttegen unaıdy. Kishkentaı tirshilik ıeleri meni qyzyqtyryp, qatty tańdandyrady, - deıdi 6-synyp oqýshysy Ranon Jálelqyzy.
