Qoǵam • 25 Qańtar, 2021

Jańaqala jigitteriniń jaqsy isi

686 ret kórsetildi

Batys Qazaqstan oblysynyń Jańaqala aýdanynda jergilikti kásipkerler, sharýa qojalyqtary mal azyǵynan tapshylyq kórip otyrǵan aýyldastaryna qamqorlyq jasap, tegin shóp pen jem taratýda.

О́tken jyly Batys Qazaqstan oblysynyń biraz jerinde qýańshylyq bolyp, shóp shyqpady. Halyq tórt túlik malyna qajetti azyqty jyldaǵydaı tolyq jınap ala almady. Sonyń biri – Jańaqala aýdany. Basyn Reseı jerinen alatyn Qaraózen men Saryózen sýalyp, áıgili Qamys-Samar kólderi birinen soń biri qurǵap qaldy. Shabyndyq suıyldy. Áli kelgender shópti Qaratóbe, Shyńǵyrlaý aýdandarynan aldyrypty. Biraq alystan aldyrýǵa ekiniń biriniń qaýqary jetpeıdi ǵoı. Mine, nátıjesinde qys ortasy bolmaı jatyp, jem-shópten taryqqan otbasylardyń janaıqaıy estile bastapty.

Osy máselege aldymen kóńil aýdaryp, aýyl azamattarynyń arasynan ún qosqan – mektep muǵalimi, Jańaqala aýdandyq qoǵamdyq keńes múshesi Rýslan Orazalıev boldy.

1

- Qazaq «Qystyń qamyn jaz oıla» degen. Biraq bıylǵy jazda qystyń qamyn oılaý túgili «baıtal túgili bas qaıǵy» bolyp, indetten qoryqqannan úıden shyǵýdyń ózi muń boldy ǵoı. Onyń ústine «Jut jeti aǵaıyndy» demekshi, qýańshylyq eldiń ezilgen eńsesin ezip jiberdi. Bizdiń Jańaqala - mal sharýashylyǵymen aınalysatyn aýdan. Halyqtyń turmys-tirshiliginiń, kún kórisiniń basty kózi de osy mal sharýashylyǵy. Alaıda, kúni búgin aýyl turǵyndarynyń mal azyǵy taýsylýǵa az-aq qaldy. Tipti keıbir aýlada taýsyldy deýge de bolady. Qoldaǵy azyn-aýlaq malymyzdy ózimiz aman alyp qalýdyń jolyn izdemesek, qamyn jasamasaq, qur taıaqqa súıenip qalmasymyzǵa kim kepil?! Birigetin, birlesip áreket etetin ýaqyt keldi, - deıdi Rýslan.

Rýslannyń jergilikti kásipkerlerge, qolynda kúshi bar sharýa qojalyqtaryna úndeý joldaǵan áleýmettik jelidegi jazbasyn birden qoldaǵan – Kópjasar aýylyndaǵy «Mýsa» sharýa qojalyǵynyń jetekshisi Tilegen Mýsın boldy.

«Atalarmyz «Ý ishseń rýyńmen», «О́le jegenshe bóle je» degen ǵoı. Inim Erbol ekeýmizdiń atymyzdan 120 rýlondy jaǵdaıy eń qıyn, satý alý múmkindigi joq otbasylaryna tegin bere alamyz. Shóptiń kimge beriletinin Rýslan ózi anyqtasyn. Elde sharýashylyǵy irgeli, aýqatty azamattar bar ǵoı. Olar da ún qosady dep senemin. Tipti tegin bermese de, baǵasyn arzandatyp, taılanǵan shóptiń ár danasyn ortasha 6 myń teńgeden berse de úlken kómek bolar edi» dep jazdy Tilegen Temirjanuly Rýslannyń bastamasyn qoldap.

Osylaısha Jańaqala aýdanynda jaqsy istiń jarysy bastaldy. Jergilikti kásipkerler shama-sharqynsha qaıyrymdylyq sharasyna jumyldy. Rýslan Orazalıevtiń aıtýynsha, úsh kúnniń ishinde aýdan aýmaǵynda 52 otbasyna 188 taı shóp tegin taratylǵan.

2

- Aqyldasyp qurylǵan birneshe adam áýeli shóp suraǵan jandardyń turmys-tirshiligimen, mal-janymen muqııat tanysyp shyqtyq. Sóıtip, ishindegi eń muqtaj otbasylaryn tańdadyq. Olardyń ishinde I top múgedekteri, 8-9 balaly otbasylar bar. «Jaqsylyq qylsań bútin qyl» degendeı, shópti árqaısynyń aýlasyna ózimiz aparyp, túsirip beremiz, - deıdi Rýslan.

Sonymen, qaıyrymdylyq sharasyna Tilegen Temirjanulynyń «Mýsa» sharýa qojalyǵynan basqa, «Nur Asyl» jáne «Amınelıa» sharýa qojalyqtary 10 rýlondy muqtaj adamdarǵa tegin, 30 rýlondy qoljetimdi baǵamen beripti. Baqtııar Jazbaev pen Abylaı Saǵyntaev esimdi jomart jandar basqaratyn «Arsen» jáne «Nurasyl» qojalyqtary Jańaqaladaǵy muqtaj jandarǵa 58 rýlon shóp tegin úılestirgen. Bir qýanarlyǵy, Jańaqala aýdandyq polısııa bóliminiń bastyǵy polısııa podpolkovnıgi Bıjan Tóremuratov aýylǵa shóp ákelgen tirkemeli traktorlardyń qaýipsizdigin qamtamasyz etip, arnaıy ekıpaj qosypty.

- El ishinde, ásirese aýdan ortalyǵynda mal azyǵyna muqtaj otbasylar kóp eken. Bárin qamtyp úlgermeı jatyrmyz. Endi erteń jem taratyp bastaımyz, - dedi Rýslan bizge telefon arqyly.

Jemdi de janashyr azamattar ortaq qorǵa tegin usynyp jatyr eken. Mysaly, «Aqtorǵaı» jeke kásipkeri Aqylbaı Sháńgereev, «Janys» ShQ basshysy Meńdibek Tilekqabylov, «Orazǵalı» ShQ basshysy Qadyrbek Aıýpov, «Saıat» sharýa qojalyǵy árqaısysy 20 qapshyqtan jem usynǵan. Mahambet Bespaev («Murager» ShQ), Baýyrjan Qapanov («Bek» ShQ), Naýryz Qurmashev («Naýryz ShQ), Áskerbek Aıýpov («Raýan» JK), Jambyl Súıinov («Súıinov» ShQ), Nurbol Mýsın («Erosh» JK), Nurbol Ońǵarov («Nurbol» JK) ta árqaısysy 5-10 qapshyq jemdi tegin berip jatyr. Salamat Serikuly degen azamat 100 otbasynyń árqaısysyna 5 qapshyqtan jem taratatynyn jarııalaǵan.

Jańaqaladaǵy jomart jandardyń jaqsylyq estafetasy jalǵasýda. 

P.S. Osy istiń basy-qasynda júrgen Rýslan Orazalıevtiń telefonyna sońǵy málimetterdi alý úshin birneshe márte habarlasyp, ala almap edik. Álginde ózi qońyraý shaldy. «Shóp túsirisip júr edim, estimeı qalyppyn. Qazir shóp ákelgen jigitterge sháı berý úshin ashanaǵa alyp bara jatyrmyn. Sonaý qyrdan shóp jetkizip, eldi qýantqan azamattardy qur jibergenim uıat bolar» deıdi Rýslan.

 

Batys Qazaqstan

Sońǵy jańalyqtar

Ulytaý aýdanynyń ákimi taǵaıyndaldy

Taǵaıyndaý • Búgin, 20:45

Aqtóbede «Igi ister» marafony bastaldy

Aımaqtar • Búgin, 17:48

Shymkentte mektepterde ystyq tamaqpen qamtýǵa ruqsat joq

Ońtústik Qazaqstan • Búgin, 15:52

Uqsas jańalyqtar