Úkimetke joǵary oqý oryndary úshin bólinetin memlekettik granttardy naryqtyń naqty suranystarymen tyǵyz baılanystyrý maqsaty júktelip tur. Jyl saıyn bólinetin granttardyń bir bóligi tıisti mamandyqtardyń suranysymen qamtamasyz etilmegen. Osy oraıda bıýdjet qarjysy jelge ushady.
«Meniń tapsyrmam boıynsha Úkimet sapasyz bilim berip jatqan joǵary oqý oryndaryn qysqartý jumysyn jalǵastyryp jatyr. Alaıda keıbir JOO-lar túrli prosessýaldyq árekettermen oqý ornyn jabý prosesin 1,5 jylǵa deıin sozyp keledi. Bilim jáne ǵylym mınıstrligine qarsy aqparattyq naýqan júrip jatyr. Úkimetke tıisti sharalardy qabyldaýdy tapsyramyn», dedi Memleket basshysy.
Osyǵan oraı Qasym-Jomart Toqaev akademııalyq adaldyqty buzǵany úshin JOO-lar jaýapkershiligin qosymsha kúsheıtý kerektigin basa aıtty.
Prezıdent sapaly bilim berip jatqan joǵary oqý oryndaryn jan-jaqty nyǵaıtý kerektigin jáne turaqty damýdy qamtamasyz etý úshin 15 bazalyq óńirlik joǵary oqý oryndaryn jańǵyrtýdy tapsyrdy.
Olar talanttardy tartýdyń óńirlik ortalyqtary retinde qyzmet etedi. Osy oraıda Úkimetke ákimdiktermen birlese 1 shildege deıin tıisti qadamdarmen, kezeńdermen ári qarjylandyrý kólemimen tyńǵylyqty jol kartasyn engizý júkteldi.
