COVID-19 vırýsyn juqtyrý boıynsha jalpy álemdik reıtıngte Qazaqstan 1 mln adamǵa shaqqanda 221 memlekettiń ishinde 109-orynda tur. О́lim-jitim boıynsha Qazaqstan reıtıngte 97-orynda, COVID-19 testilenýshiler sany boıynsha — 69-orynda, saýyqqandar sany boıynsha — 87-orynda, aýyr jaǵdaılar sany boıynsha — 50-orynda.
«Pandemııa bastalǵannan beri Qazaqstanda COVID-19 oń nátıjesimen 179 720 naýqas jáne KVI- nátıjesimen 47 445 jaǵdaı tirkeldi. Naýqastardyń 87%-y saýyǵyp ketti. Búgingi tańda ınfeksııalyq stasıonarlardyń júktemesi — 31%, reanımasııalyq tósek-oryndardyń júktemesi 19% quraıdy», — dedi vedomstvo basshysy.
Sondaı-aq, onyń aıtýynsha, Densaýlyq saqtaý mınıstrligi kún saıyn matrısaǵa sáıkes epıdemııalyq jaǵdaıǵa baǵalaý júrgizedi. Máselen, 26 qańtardaǵy jaǵdaı boıynsha «qyzyl aımaqta» 8 óńir bar: Aqmola, Atyraý, Qostanaı, Pavlodar, Batys Qazaqstan, Soltústik Qazaqstan oblystary jáne Nur-Sultan jáne Almaty qalalary.
Bul rette Aqmola, Pavlodar, Qostanaı oblystarynda epıdemıologııalyq ahýalǵa tıisti baqylaýdyń joqtyǵy baıqalady.
«Nátıjesinde, eldegi aýrýlardyń 40%-y osy aımaqtarǵa tıesili. Osyǵan baılanysty osy óńirlerdiń ákimderi tıimdi qosymsha shekteý sharalaryn qabyldap, olardyń saqtalýyn baqylaýdy qamtamasyz etýi qajet», — dedi A. Soı.
Jalpy respýblıka boıynsha qarasha aıynan bastap KVI aýrýynyń ósýi baıqalady, jeltoqsan aıynda qarasha aıymen salystyrǵanda 1,2 ese ósý baıqaldy. Ortasha ósý úrdisi qańtar aıynda da saqtaldy. Máselen, qańtar aıynda KVI-men aýyrýdyń 24 247 jaǵdaıy tirkelgen.
Shyǵys Qazaqstan oblysyn qospaǵanda, barlyq óńirlerde syrqattanýshylyqtyń ósýi baıqalady.
Naýqastarǵa kómek kórsetý úshin Qazaqstanda 74 myńnan astam dáriger tartylǵan, onyń ishinde 28 myńǵa jýyǵy — beıindi mamandar.
Aýyl halqynyń medısınalyq kómekke qoljetimdiligi qolda bar jyljymaly medısınalyq keshender esebinen, onyń ishinde 2020 jyly qoıylǵan 100 JMK esebinen qamtamasyz etiledi.
Sondaı-aq, 2020 jyly óńirlerge 1167 birlik sanıtarlyq avtokólik kelip tústi. Infeksııalyq stasıonarlarǵa 5 myńnan astam О́JJ apparaty jetkizildi, shamamen 43 myń tósek-oryn ottegimen qamtamasyz etildi.
Budan basqa, 15 ınfeksııalyq stasıonar salyndy, 3 qaıta beıindelgen nysannyń jóndeý jumystary aıaqtaldy, 1 nysannyń qurylysyn aǵymdaǵy jyldyń aqpan aıynda aıaqtaý josparlanyp otyr.
Barlyq óńirlerde jalpy somasy 17 mlrd teńgege turaqtandyrý qorlary quryldy.
«Biryńǵaı dıstrıbıýtordyń 4 habynda COVID-19 boıynsha dári-dármekterdiń eki aılyq jańartylatyn qory, 10 mln maska jáne 400 myń jeke qorǵanys quraldary qalyptastyryldy. Testileý qýaty táýligine 40 myńnan 100 myńǵa deıin artty. Osylaısha, qabyldanǵan sharalar COVID-19 aýrýynyń aǵymdaǵy ósýin eskere otyryp, halyqtyń medısınalyq kómekke qoljetimdiligin qamtamasyz etýge múmkindik beredi», — dedi densaýlyq saqtaý mınıstri.
Memleket basshysynyń tapsyrmasyna sáıkes, 1 aqpanda respýblıkada vaksınasııa naýqany bastalady dep josparlanýda.
«Vaksınasııa vaksınanyń túsýin eskere otyryp, kezeń-kezeńimen júzege asyrylady. Jyl sońyna deıin 6 mln-ǵa jýyq qazaqstandyqty vaksınasııalaý josparlanǵan. Birinshi kezeńde vaksınasııa KVI-men kúresýdegi "alǵashqy jeli" qyzmetkerlerine jasalady — bul medısına qyzmetkerleri, pedagogtar jáne kúsh qurylymdarynyń qyzmetkerleri», — dep atap ótti ol.
Qazirgi ýaqytta vaksınasııany bastaýǵa daıyndyq jumystary aıaqtalýda. Júıeli esepke alý maqsatynda vaksınasııalaýdyń elektrondyq pasporty ázirlendi. Vaksınasııa júrgizý týraly derekter mınıstrliktiń ortalyqtandyrylǵan aqparattyq júıesinde elektrondyq formatta júrgiziletin bolady.
«Veb-qosymshada pasıent pen medısına qyzmetkeriniń m-gov mobıldi qosymshasynda aqparatty qolmen engizýge múmkindigi bar», — dep qosty A. Soı.
Sondaı-aq, mınıstr 2021 jyldyń sońyna deıin epıdemıologııalyq ahýaldy damytý jónindegi boljamdarymen bólisti. Máselen, mindetti maska rejımin, áleýmettik ara qashyqtyqty jáne kútiletin vaksınasııany qosa alǵanda, qoldanystaǵy shekteý sharalaryn saqtaı otyryp, aýrý jaǵdaılaryn tirkeýdiń yqtımal órshýi osy jyldyń naýryz aıynyń sońynda oryn alýy múmkin.
Optımıstik ssenarıı boıynsha táýligine 3 myń jaǵdaıǵa deıin tirkeý kútilýde, al tósek-oryn qorynyń qamtylýy 24 myń tósek-orynǵa deıin jetýi múmkin.
Pessımıstik ssenarıı boıynsha tirkeý táýligine 9 myń jaǵdaıǵa, al tósek-oryn qoryn qamtý 45 myń tósek-orynǵa deıin jetýi múmkin, bul densaýlyq saqtaý júıesiniń shamadan tys júktemelenýine jol bermeý úshin qatań karantın sharalaryn engizýdi qajet etýi múmkin.
Boljam boıynsha, birinshi jartyjyldyqta 2 mln adamdy vaksınasııalaý 40 myńǵa deıin tirkeletin jaǵdaıdy azaıtady. Vaksınasııadan bolatyn áser birinshi kezeńde ımmýnıtetti qalyptastyrýǵa qajetti ýaqytpen jáne halyqtyń kóp sanyn bir mezette vaksınasııalaýdyń múmkin emestigimen shekteletin bolady. Keıinnen vaksınasııanyń áseri kúsheıip, eldegi epıdemıologııalyq jaǵdaıdyń turaqtanýyna áser etedi.
Prezıdent Qasym-Jomart Toqaevtyń suraqtaryna jaýap bere otyryp, densaýlyq saqtaý mınıstri Alekseı Soı Básekelestikti qorǵaý jáne damytý agenttigimen birlesip jumys istegennen keıin dárilik preparattardyń baǵasyn 27%-ǵa tómendetýge qol jetkizilgenin aıtty.
Sondaı-aq, «Halyq densaýlyǵy týraly» Kodekske túzetýler engizý, atap aıtqanda, bólshek saýda naryǵyndaǵy baǵalardy retteýdi joıý josparda bar. Mınıstrdiń aıtýynsha, osynyń arqasynda bólshek segmenttegi baǵany tómendetý úshin qosymsha negiz qurýǵa bolady. Sondaı-aq, densaýlyq saqtaý mınıstri sybaılas jemqorlyq táýekelderine syrtqy taldaý júrgizý týraly baıandady.
«Qazir naqty jospar ázirlendi, ol sybaılas jemqorlyqqa qarsy qyzmettiń baqylaýynda. Biz quramyna azamattyq qoǵam ókilderi men depýtattar qatarynan 23 adam kiretin qoǵamdyq jumys tobyn qurdyq. Sondaı-aq, bizdiń “SQ-Farmasııa”-nyń baqylaýshy keńesi qosymsha qoǵam ókilderin de qosty. Dárilik zattardy saqtaý jáne tasymaldaý boıynsha qyzmetterdi elektrondyq satyp alýǵa kóshý óte mańyzdy. Qazir ol tolyqtaı elektrondy. Bıyl biz dári-dármekterdi satyp alý prosesin tolyǵymen avtomattandyrýdy jáne ony 100% jańa formatqa kóshirýdi josparlap otyrmyz, bul da oń nátıjesin beredi», — dedi ol.
A. Soıdyń aıtýynsha, osy ózgeristerdiń arqasynda ótken jylmen salystyrǵanda shamamen 32,7 mlrd teńge únemdeldi. Sondaı-aq, «SQ-Farmasııa»-ny qaıta júktemeleýdiń jeke baǵdarlamasy ázirlendi. Qazir damýdyń jańa strategııalary jasaldy. Máselen, ótken jyly salany yntalandyrý úshin otandyq taýar óndirýshilermen 24 uzaq merzimdi kelisimshart jasaldy. Dárilik zattar men buıymdardyń 1465-ke jýyq jańa ataýy málimdelip, Qazaqstan ishinde shyǵarylatyn bolady.
Medısınalyq mekemelerdiń vaksınasııalaýǵa daıyndyǵyna qatysty, densaýlyq saqtaý mınıstri barlyq medısınalyq uıymdardyń tıisti oqytýdan ótkendigi týraly baıandady. Olardyń árqaısysy vaksınasııa boıynsha barlyq múmkin suraqtardy taldap, «sýyq» tizbekti qamtamasyz etti.
«4 gradýstan 8 gradýsqa deıingi temperatýralyq rejımde bul logıstıkalyq jeli salynǵan. Ol jumys isteıdi. Biz úshin tizbekti -20 formatynda qamtamasyz etý qosymsha qıyndyq boldy, óıtkeni alǵashqy vaksına reseılik "Spýtnık V" bolady. О́ńirlermen tıisti jumystar júrgizildi, qosymsha tońazytqysh jabdyqtary satyp alyndy. О́ńirlerdegi “SQ-Framasııa”-nyń barlyq habtarynda bul jabdyq bar. Qazir logıstıka tekserilýde», — dedi densaýlyq saqtaý mınıstri.
Sondaı-aq, ol medısına qyzmetkerlerin oqytý boıynsha operasııalyq prosedýranyń arnaıy standarty jáne vaksınany qoldaný jónindegi nusqaýlyqtyń jasalǵanyn aıtty. Sonymen qatar, qazirgi ýaqytta mınıstrlik BAQ-ta jarııalaý jáne halyqqa vaksınasııanyń paıdasy, kezeńderi, kórsetkishteri men qarsy kórsetilimderi, medısınalyq qarsy kórsetilimderi týraly aqparatty jetkizý úshin materıaldar daıyndady.
