2021 jyldyń Jyl kitaptaryn tańdaý boıynsha «Bir el – bir kitap» aksııasy komıssııasynyń kezekti otyrysy ótti. Otyrys qorytyndysy boıynsha, el Táýelsizdiginiń 30 jyldyǵyna oraı, jalpyhalyqtyq oqýǵa «Táýelsizdigimizdiń 30 jyldyǵyna – 30 kitap» rýhanı-mádenı aksııasy usynyldy. «Aýdarma» nomınasııasynda «Folıant» baspasynan jaryq kórgen Haled Hosseı̆nıdiń «Jarqyraǵan myń kún» romany bar. Aýdarǵan – halyqaralyq, respýblıkalyq jyr dodalarynyń júldegeri, aqyn Tólegen Mellat.
Roman sońǵy jarty ǵasyrda álem nazaryn ózine jıi aýdarǵan Aýǵanstannyń ashyq ta tuńǵıyq ómir shyndyǵyn, tynys-tirshiligin boıamasyz beıneleıdi. Soǵys órti tolastamaǵan, qarańǵylyq pen nadandyq ústemdik qurǵan qoǵamdaǵy adam taǵdyry men áıelder ómirin, mahabbattyń muń-nalasyn aıshyqty tilmen anyq jetkizedi.
Oqıǵa Aýǵanstandaǵy HH ǵasyrdyń ekinshi jartysyndaǵy azamattyq soǵys tóńireginde órbıdi. Avtor soǵysty bizge áıelder jáne analar kózimen kórsetedi. Shyǵys eliniń turmys-tirshiligimen, turǵyndarynyń taǵdyrymen tanystyrady. Adamdarynyń armandary men qorqynyshtaryn, úmitteri men qasiretin baıandaıdy. Ásirese shyǵarmadaǵy minezderi men áleýmettik jaǵdaılary ártúrli qasireti men muńy bir eki áıeldiń taǵdyry eshkimdi beıjaı qaldyrmaıdy.
Márııam – baı kásipkerdiń 15 jasynda kúshtep turmysqa shyǵarǵan nekesiz qyzy. Al Leılá – zııaly otbasynda dúnıege kelip, joǵary bilim alýdy armandaǵan baqytty qyz. Soǵys atty zulym kúsh eki taǵdyrdy bir arnaǵa toǵystyrady. Ortaq qasiret negizinde qurylǵan dostyq ta bar týyndyda. Soǵys azaptarymen birge, otbasyndaǵy zorlyq-zombylyq, musylman áıelderiniń quqyqtary men bostandyqtary taqyryby da qozǵalady.
