Is-sharaǵa sýretshiler men ónertanýshylar, BKM men astanadaǵy óner, mýzyka mektepteriniń jetekshiligi, oqytýshylary men oqýshylary, Bilim berýdi jańǵyrtý ortalyǵy men «Rýhanı jańǵyrý» jobalyq keńsesiniń ókilderi qatysty. Kórmege ártúrli tehnıkada oryndalǵan mektep túlekteriniń 50-den astam jumysy qoıyldy. «Týǵan ólkem» respýblıkalyq baǵdarlamasynyń aıasynda Elbasy kitaphanasy men Nur-Sultan qalasynyń Balalar kórkemsýret mektebi – IýNESKO klýbynyń ótkizetin kórmeleri bıyl úshinshi ret uıymdastyrylyp otyr. Bul rette jobanyń ashylý saltanaty Táýelsizdiktiń 30 jyldyǵymen tuspa-tus kelip tur. Kórmege qatysqan 15-16 jastaǵy sýretshiler táýelsizdik dáýirinde dúnıege kelgen. Olardyń balalyq shaǵy, ómiri men shyǵarmashylyǵy egemendigimizden sýsyndaıtyny haq. Búginde qalyń jurttyń nazaryna usynýly turǵan jastardyń jumystary – táýelsizdiktiń jemisi», dedi Qazaqstan Respýblıkasynyń Tuńǵysh Prezıdenti – Elbasy kitaphanasynyń dırektory Baqytjan Temirbolat.
N.Á.Nazarbaevtyń «Rýhanı jańǵyrý» baǵdarlamalyq maqalasy aıasynda oryndalǵan «Týǵan ólkem» respýblıkalyq baǵdarlamasy jas talanttardy anyqtaýǵa jáne respýblıkanyń qosymsha bilim berý uıymdarynyń jumysyn nasıhattaýǵa baǵyttalǵan. Baǵdarlama 2018 jyldan bastap júzege asyrylyp keledi. Osy ýaqyt ishinde Elbasy kitaphanasynyń alańynda Semeı, Shymkent, Pavlodar, Ekibastuz, Qaraǵandy, Shahtınsk jáne Kókshetaý qalalary mektepteri túlekteriniń dıplomdyq jumystarynyń kórmeleri usynylǵan edi.
– Biz, sýretshiler qaýymy úshin halyq úmitin tolyq aqtaı alatyn daryndy, parasatty býynnyń boı kóterip kele jatqanyn kórý – úlken qýanysh. Kórmeniń ereksheligi usynylǵan jumystardyń qashyqtan oryndalǵanyna negizdeledi. Bul úrdistiń oqytýshylarǵa da, oqýshylarǵa da ońaıǵa soqpaǵany anyq. Degenmen de týyndylar deńgeıiniń bıiktigin joǵaltpaı, kelýshilerdiń kózaıymyna aınalyp otyr. Keskindeme, grafıka, sándik-qoldanbaly óner – bári de kózdiń jaýyn alady. Qıyn-qystaý kezeńde bul sulýlyqty tamashalaý múmkindigin bergen uıymdastyrýshylarǵa alǵysymyz zor, – deıdi Sýretshiler odaǵy basqarmasynyń múshesi, sýretshi Dınara Nóger.
Aıta keteıik, elordadaǵy Balalar kórkemsýret mektebi – IýNESKO klýby 1983 jyly qurylǵan. Sodan bergi jyldar aralyǵynda mektep ózindik dástúrlerdi qalyptastyryp, kórkemdik bilim berý salasynda pedagogıkalyq jumys tájirıbesin jınaqtady. Al atalǵan kórme 25 aqpanǵa deıin jalǵasady.
