Bul eńbek daýyna baılanysty oblystyq ákimdikte qurylǵan úshjaqty komıssııanyń qorytyndysy nátıjesinde belgili boldy. Qańtardyń 24-nen beri Muǵaljar aýdanynyń Kókjıde kenishinde munaı óndiretin «KMK munaı» AQ-nyńeńbekkerleri jalaqyny kóterý, áleýmettik paketterdi retteý talabymen jumysqa shyǵýdan bas tartqan bolatyn. Olarǵa 28 qańtar kúni Temir aýdanynyń Báshenkól kenishindegi «AMK munaı» kompanııasynda vahtalyq ádispen jumys isteıtin 80 munaıshy qosyldy. Ereýildiń birinshi kúni «AMK Munaı» basshylyǵy munaıshylardyń jalaqysyn 7 paıyzǵa kóbeıtýdi usynǵanymen, olar bul jaýapqa kelispeı 100 paıyzǵa joǵarylatý týraly talap qoıdy.
Oblystyq eńbek ınspeksııasy jónindegi basqarma basshysy Salamat Amanbaevtyń habarlaýynsha,«AMK munaıda» 125 adam jumys istese, ondaǵy ortasha jalaqy 77 myń teńge dep kórsetilgen. Úshjaqty komıssııa nátıjesinde munaı kompanııasymen arada jańa eńbek shartynyń jasalatyny belgili boldy.
«AMK Munaı» kompanııasy ár jumysshynyń jalaqysyna aqpan aıynan bastap 40 000 teńgeden qosýǵa kelisti. Kompanııa Naýryz merekesi kezinde jumysshylaryna 50 paıyz syıaqy beretin boldy. Mamyr aıynan bastap «AMK Munaı» kompanııasynyń qyzmetkerlerimen jańa eńbek kelisimsharty jasalady. Jańa kelisimshart jasaǵan kezde oblystyń munaı salasyndaǵy ortasha jalaqyny eskeriledi», deıdi Salamat Amanbaev.
«AMK Munaı» kompanııasy «ADA Oil» kompanııasynyń sýbmerdigeri. Baqylaýshy paket aksııalary Ońtústik Koreıanyń memlekettik ulttyq (Korea National Oil Corporation, KNOC) korporasııasyna tıesili «ADA Oil» kompanııasy elimizde qazaq-káris birlesken kásiporny retinde tirkelgen.
Oblystyq kásipodaq ortalyǵynyń basshysy Altynbek Ámirǵalıev jumys berýshiler men jumysshylar arasyndaǵy eńbek daýynyń órshýine ujymda bastaýysh kásipodaq uıymynyń joqtyǵy da sebep boldy deıdi. Osy kezge deıin vahtalyq ádispen jumys isteıtinder jalaqynyń azdyǵy, jataqhananyń talapqa saı emestigi men ashanada beriletin astyń sapasyzdyǵyna baılanysty basshylyqqa birneshe ret eskertse de, olardyń talaptary nazardan tys qalǵan. Qazir 125 munaıshy jumys isteıtin «AMK Munaı» kompanııasynda bastaýysh kásipodaq uıymy qurylyp, eńbekkerlermen ujymdyq shart qaıtadan jasalatyn boldy.
