Qazaqstandyq onkologtardyń aksııasyn Roza Rymbaeva, Tolqyn Zabırova, Baıan Maqsatqyzy, Jeńis Ysqaqova, Rústem jáne Alınýr Nurjigit, Aıgúl Múkeı, Saǵynaı Abdýlın, Aıbek Janseıitov (Búrkit), Elena Isaeva, Aıda Kaýmenova, Janna Orynbasarova, Aıgúl Babaeva, Asha Mataı, Nurbergen Mahambetov jáne Aısáýle Baqytbek qoldady.
Eń kóp taralǵan qaterli isik túrlerin erte anyqtaýǵa arnalǵan onkoskrınıngterdi turǵylyqty jeri boıynsha (tirkelgen jeri boıynsha) emhanalardan ótýge bolady.
1) Sút bezi qaterli isiginiń skrınıngi. 40 jastan 70 jasqa deıingi áıelder. 2 jylda 1 ret.
2) Jatyr moıny qaterli isiginiń skrınıngi 30 jastan 70 jasqa deıingi áıelder. 4 jylda 1 ret.
3) Kolorektaldy qaterli isik skrınıngi (toq jáne tik ishektiń qaterli isigi). 50 jastan 70 jasqa deıingi erler men áıelder. 2 jylda 1 ret.
Onkoskrınıng kez kelgen ýaqytta qol jetimdi jáne aqysyz! Esińizde bolsyn, erte anyqtalǵan dıagnoz ómirdi saqtaıdy.
Jyl saıyn 4 aqpanda Halyqaralyq obyrǵa qarsy odaqtyń (UICC) bastamasy boıynsha Dúnıejúzilik obyrǵa qarsy kúres kúni atap ótiledi. Qazaqstanda jyl saıyn 36 myńǵa jýyq jańa qaterli isik aýrýy tirkeledi. Búgingi tańda dıspanserlik esepte 180 myńnan astam onkologııalyq naýqastar tur. Jyl saıyn onkologııalyq aýrýlardan 14 myń adam qaıtys bolady.
Qazaqstanda eń kóp taralǵan qaterli isik túrleri: sút bezi qaterli isigi, ókpe qaterli isigi, asqazan qaterli isigi, jatyr moıny qaterli isigi jáne kolorektaldy qaterli isik. Qazaqstandyqtar úshin onkologııalyq aýrýlardy dıagnostıkalaý men emdeý tegin medısınalyq kómektiń kepildik berilgen kólemine kiredi jáne ony memleket tolyq qarjylandyrady.
