Sarapshylardyń bul ınstıtýtqa saparyna kúlli álem jurtshylyǵy kóz tigip otyr. Osydan biraz buryn M. Raıan bastaǵan DSU sarapshylary Qytaıǵa baryp turyp jumystaryn atqarýǵa ruqsat ala almaı keri qaıtqany este. Araǵa ýaqyt salyp, Qytaı bıligi men DSU arasynda júrgen kelissózder nátıjesinde sarapshylar shyǵysqa qaıtadan bet alyp, 28 qańtardan jumysyn bastady.
AQSh-tyń eks prezıdenti Donald Tramp jáne birqatar ǵalymdardyń dúnıeni astan-kesten etken COVID-19 tabıǵı jolmen paıda bolmaǵan, ol Ýhan zerthanasynan shyqty degen kúdigine baılanysty planeta turǵyndarynyń sarapshylar saparyn jiti qadaǵalaıtyny óz-ózinen túsinikti jaıt.
Zoonozdyq ınfeksııalar men azyq-túlik qaýipsizdigi jónindegi Dúnıejúzilik uıymnyń sarapshysy Pıter Ben Embarek jetekshiligimen Qytaıǵa attanǵan sarapshylar quramyna kirgen EcoHealth Alliance úkimettik emes uıymnyń prezıdenti Pıter Daszak: «Men jaýapty adamdarmen júzdesip, olarǵa mańyzdy suraqtar qoıyp, jaýap estıtin kúndi asyǵa kútemin», degen-di. Aıtqandaı olar Qytaıǵa tabandary tıisimen birden Ýhanǵa jol tarta alǵan joq. Aldymen osy elge syrttan kiretin ózge de sheteldikter tárizdi eki aptalyq karantınde boldy.
Sarapshylar Ýhan Vırýsologııa ınstıtýtyna deıin sol qaladaǵy ınfeksııanyń alǵashqy taraý oshaǵy deıtin bazarda, birneshe aýrýhanalarda jáne janýarlar aýrýlaryn zertteıtin ortalyqqa barǵan. Ázirge Vırýsologııa ınstıtýtynda kórgen-bilgenderi jaıynda esh aqparat jarııa etilgen joq. Soǵan qaraǵanda ol osy sapar jaıyndaǵy qortyndy esepke kiretin syńaıly.
