Aqtóbe oblysynda kásipkerlik nysandarynyń kóbeıýi jaǵynan Muǵaljar aýdany kósh bastap keledi. Qazirgi ýaqytta munda 3 myńnan astam kásipker tirkelgen. Aýdanda «Bıznestiń jol kartasy – 2025» baǵdarlamasymen 1,5 mlrd teńgege 21 joba maquldanyp, «Qarapaıym zattar ekonomıkasy» baǵdarlamasy boıynsha 11 iri joba iske asyp jatyr. Nátıjeli jumys arqyly aýdanda tirkelgen shaǵyn jáne orta kásipkerlik nysandary ótken jyly 104 %-ǵa ósken.
Ǵalym Aıtymbetov ótken jyldyń sońynda aýdan ortalyǵy Qandyaǵash qalasynda jıhaz jasaıtyn seh ashqan bolatyn. Az ýaqyttyń ishinde Ǵalymnyń sehy qanatyn keńge jaıyp, qazir 12 azamatqa turaqty jumys taýyp berip otyrǵan óndiris ornyna aınaldy.
– Jumysqa kiriskenimizge kóp ýaqyt óte qoımasa da, tapsyrys óte kóp bolǵandyqtan, bastapqyda eki-úsh adammen jumys kólemin ıgerý óte qıynǵa tústi. Sol sebepti jan-jaqqa suraý salyp, 12 adamdy jumysqa qabyldadyq. Qazir olardyń eńbekaqysy 150-200 myń teńge aralyǵynda. Jumys kólemi kóbeıse, eńbekaqy da artady. Árıne, jumyskerlerden eń birinshi talap etiletini – alǵan tapsyrysty der kezinde sapaly oryndaý ǵana. Osy talaptan shyqqan mamandarymyz qalady, al mindetine júrdim-bardym qaraǵandarǵa bizde oryn joq, – deıdi Ǵ.Aıtymbetov.
Kásipker jeke kásibin ashýǵa kezdeısoq kelgen joq. Ol 2000 jyly osy aýdannyń Aqkemer eldi mekenindegi úıdiń bir bólmesinen qolda bar quralymen jıhaz jasaýdy bastaǵan edi. Az ýaqyttyń ishinde Ǵalymnyń sheberligi Aqkemer aýylynan asty. Aqtóbe qalasynan, Baıǵanın, Temir, Shalqar aýdandarynan tapsyrys kóptep túse bastaǵanda, kásibin keńeıtýdiń tóte joly – Qandyaǵash qalasynda jıhaz jasaıtyn jańa seh ashý dep túsindi. Osy iske bel baılaǵan kásipker ótken jyldyń basynda «Qarapaıym zattar ekonomıkasy» baǵdarlamasy sheńberinde jeńildetilgen nesıe alýǵa qujattar ázirledi. 20 mln teńge qarjyǵa qol jetkizgen soń jıhaz sehynyń qurylysyna kiristi. Bes aı ishinde óndiris ornyn talapqa saı jabdyqtap, jıhaz jasaýǵa qajetti jańa jabdyqtarǵa tapsyrys berdi. Qazir Ǵalymnyń sehy Qandyaǵash qalasyndaǵy eń tańdaýly jıhaz jasaıtyn orynǵa aınaldy. Shıkizatty syrttan tasyǵandy asa unatpaıtyn kásipker otandyq ónimdi paıdalanady. Jıhaz aǵashtaryn Qostanaıdan aldyrsa, basqa kerek-jaraqtardy ózderi-aq jasap alyp júr. О́ıtkeni Ǵalymnyń jumyskerleriniń arasynda temirden túıin túıgen sheberler de bar.
Aqtóbe oblysy,
Muǵaljar aýdany
