1-aqpanda bastalǵan is-sharanyń alǵashqy eki kúni ishinde 10 sheteldik azamat ákimshilik jaýapkershilikke tartyldy. Kóshi-qon polısııasynyń málimetinshe, olardyń kóbiniń el aýmaǵynda júrýge ruqsat beretin qujattarynyń merzimi ótip ketken. Tipti bir jyldan artyq ruqsatsyz júrgender de bar. Bulardyń ekeýi respýblıka aýmaǵynan shyǵaryldy.
Sonymen qatar, Qazaqstan Respýblıkasyna kelgeni týraly der kezinde habarlamaǵan 19 azamat ákimshilik jaza arqalady.
Máselen, Jitiqara qalasynda 2019 jyldyń 19-mamyrynan beri zańsyz jumys istep kelgen О́zbekstan azamaty anyqtalyp, jumysshy da, jumys berýshi de ákimshilik jaýapkershilikke tartyldy. Qazir kóshi-qon qyzmeti men «Damytý» qoǵamdyq qory ózbekstandyq azamattyń quqyqtyq mártebesin anyqtap jatyr. Ol taıaý kúnderi óz otanyna qaıtarylmaq.
Sheteldikter oblysqa kóbine jumysqa turý nemese oqý, emdelý, mıssıonerlik qyzmetpen aınalysý úshin keledi eken. Olardyń ishinde osy jerde otbasyn quryp, turaqtap qalǵysy keletinder de bar. Kóshi-qon qyzmeti mamandarynyń aıtýynsha, oblys aýmaǵyna zańdy negizde kelgen árbir shetel azamatynyń quqyqtyq mártebesiniń rettelýine kómek kórsetiledi. Eń bastysy, azamat tıisti oryndarǵa óziniń syrttan kelgeni týraly der kezinde habarlaýy tıis.
