1975-1983 jyldary aralyǵynda salynǵan, Almatynyń sımvoly ispettes telemunara bıiktigi jaǵynan álemde 32-oryn alyp keldi. 2011 jyldyń qańtarynda oǵan eki lıft qoıyldy.
Osydan 5 jyl buryn Almatyda arhıtektýralyq jaryqtandyrý tujyrymdamasy qolǵa alynyp, telemunara jarqyrap shyǵa keldi.
Munaranyń teńiz deńgeıinen bıiktigi 1 452 metrdi quraıdy. Qazirgi ýaqytta «Kóktóbe» telemunarasy – Qazaqstannyń televızııalyq habar tartatyn sıfrly formatqa kóshirý úrdisindegi eń mańyzdy nysandardyń biri. Munaranyń dál júreginde búkil Qazaqstan boıynsha sıfrly habar taratý jelisin baqylaıtyn «Qazteleradıo» jeli sapasyn basqarý jáne monıtorıngteý ortalyǵy ornalasqan.
Endigi jerde Almatyda balama habar taratý tájirıbesi tolyǵymen tarıh qoınaýyna endi dese de bolady. 3 aqpan kúni shahar basshysy Baqytjan Saǵyntaev «Kóktóbe» telemunarasynda balama telehabar taratý jelisin óshirý rásimine qatysty. Osylaısha, Almatynyń ákimi megapolıstiń sıfrly televızııaǵa tolyq kóshkenin málimdedi.
«Jobany kezeń-kezeńmen iske asyrý kezinde Almaty men oblystaǵy 90 sıfrly radıotelevızııalyq stansa paıdalanýǵa berildi. Bul – 3,8 mıllıonnan astam turǵyny bar 736 eldi mekendi sıfrly efırlik telehabar taratý júıesimen qamtýǵa múmkindik ashty», – dedi Almatynyń ákimi.
Sıfrly standart otandyq telearnalardyń habar taratý úlesin ulǵaıtyp, eldiń aqparattyq resýrsyna teń quqyqty qoljetimdilikti qamtamasyz etedi. Buǵan deıingi 4-5 telearnanyń ornyna endi qazaqstandyq 30-ǵa jýyq telearnany tańdaýǵa múmkindik bar. Bul rette qymbat spýtnıktik tabaqty ornatýdyń da, kabeldik operatorǵa aqy tóleýdiń de qajeti joq. Áleýmettik osal toptaǵy azamattar sıgnal qabyldaǵyshtar arqyly tegin qamtamasyz etiledi.
Sonymen sıfrly rejimge kóshýdiń resmı rásimi de «Kóktóbe» telemunarasynda ótti. Ol respýblıkadaǵy eń bıik jáne tek Almaty aýmaǵyn ǵana emes, sonymen qatar jaqyn mańdaǵy 200 eldi mekendi sıfrly sıgnalmen qamtıdy. Bul Almaty oblysy turǵyndarynyń 40 paıyzyn quraıdy.
ALMATY
