Ekpe bastalǵan kúni oblystyq densaýlyq saqtaý basqarmasynyń basshysy Sábıt Pazylov pen sanıtarlyq-epıdemııalyq baqylaý departamenti basshysy Dınara Jańabergenova brıfıng ótkizip, aımaqta 32 egý kabıneti men 16 jyljymaly egý brıgadasy jumys isteıtindigin atap ótti. Qazir oblysqa qajetti 80 myń dozanyń 1 myń danasy jetkizildi. Qalǵany keste boıynsha ákelinedi. Oblys ortalyǵyndaǵy №1, 3 jáne 6 emhanalardan egý kabınetteri daıyndalǵan. Jalpy bul jumysqa oblys boıynsha 133 meıirbıke men 89 dýbler jumyldyrylyp otyr. Aldyn ala jasalǵan irikteýden keıin vaksınalaýdan ótetinderdiń 8,4 paıyzyn medısına qyzmetkerleri, 23,5 paıyzyn bilim salasy mamandary, jartysynan kóbin dert juqtyrý qaýpi neǵurlym joǵary sozylmaly aýrýlary bar turǵyndar, 10,3 paıyzyn stýdentter quraıtyny belgili bolyp otyr.
Egý jumystaryna daıyndyq barysynda telemedısına arqyly alǵashqy medısınalyq-sanıtarlyq
kómek kórsetý medısınalyq uıymdardyń 65 mamanyna «Oblystyń medısına uıymdarynda «Spýtnık V» vaksınasynyn júrgizýdiń alǵysharttary, qabyldaý, tasymaldaý jáne egý jumystaryn uıymdastyrý algorıtmi men vaksınalaýǵa kórsetkishter men qarsy kórsetkishter» taqyrybynda semınar ótkizildi. Oblys boıynsha maýsymǵa 8 stasıonar, 61 alǵashqy medısınalyq-sanıtarlyq mekeme jumyldyrylady. Onda 54 súzgi kabıneti, qosymsha 79-y telefon shaqyrýlar men keńes berý úshin jumys isteıdi. Úı jaǵdaıynda qyzmet kórsetý úshin qosymsha 81 avtokólik bólindi.
Qyzylorda oblysy
