«Jaýyn-shashyn kárizi júıesine qatysty syn kóp. Qala jyldam ósip kele jatyr. Tipti álemdegi, eń qarqyndy damýshy qalalardyń biri desek te bolady. Halyq sany ósip, jańa joldar, jańa nysandar paıda bolýda. Jańa shaǵyn aýdandar da salynyp jatyr. Injenerlik ınfraqurylym máselesi kúntártibinde tur. Jaýyn-shashyn kári júıesine baılanysty Elorda eco systems kásipornyn qurdyq. Ol dál osy máselemen aınalysady. Qalada birneshe problemaly ýchaske bar. Olar: Baýyrjan Momyshuly dańǵyly, J.Táshenov, Respýblıka dańǵyly jaqtan A.Imanov kósheleri, Turan, Uly dala dańǵyldary. Momyshuly boıynsha jumysty aıaqtap, dıametri úlken qubyr tósedik, qosymsha sorǵysh qoıdyq. Úlken jums jasaldy. Qazirgi ýaqytta ol jerde burynǵydaı problema joq», dedi Altaı Kólginov.
Onyń aıtýynsha, Tashenov kóshesi buryn batpaqty jer bolǵan. Osy tusqa tazartý qondyrǵysy ornatyldy. Ol 42 myń tekshe metr jaýyn-shashyn sýyn jınap, tazartyp, odan keıin ózgenge aǵyzyp otyratyn bolady.
«Elorda eco systems kásiporyndary qudyqtardy tazartýmen de aınalysady. Máselen, Táshenov kóshesiniń boıyndaǵy bir ǵana ýchaskeden 30 myń tonnadan astam qoqys shyǵaryldy. Aryqtar men qudyqtan 2,5 myń tonna qoqys alyndy», dedi ol.
Sondaı-aq, elorda ákimi «Telman» turǵyn alabyndaǵy magıstraldi kollektor men tazartý qondyrǵysy jumystarynyń aıaqtalǵanyn atap ótti. Onyń qýaty táýligine 36 myń tekshe metrdi quraıdy. Bul jobany júzege asyrý «Telman» turǵyn alaby men № 27 kóshe boıyndaǵy jáne basqa da qurylysy qarqyndy júrip jatqan aýmaqty sý basýdan qorǵaýǵa múmkindik beredi.
