Jýaly aýdany ınvestısııa tartý boıynsha sońǵy orynda tur

Aımaqtar • 10 Aqpan, 2021

Jýaly aýdany ınvestısııa tartý boıynsha sońǵy orynda tur

Jambyl oblysynda aýdan ákimderiniń halyqqa esep berý kezdesýleri jalǵasýda. Oblys ákimi Berdibek Saparbaev Jýaly aýdanynyń ákimi Narbaı Ergebekovtiń esepti jıynyna qatysyp, jergilikti turǵyndardyń talap-tilegin tyńdady, dep habarlaıdy Egemen.kz.

Hamıt ESAMAN

Narbaı Ergebekov óz sózinde memlekettik baǵdarlamalardyń oryndalý jaıyna toqtaldy. Odan bólek, qaıtarymsyz memlekettik granttar berý jónindegi oblystyq konkýrstyq komıssııanyń qaraýyna 44 joba joldanǵan. Nátıjesinde, aýdandaǵy eki kásipker atalǵan grantqa ıe bolyp, óz kásibin bastaǵan. Sondaı-aq aýdannyń tórt shaǵyn nesıe uıymy arqyly 3491 adam jalpy kólemi 2,7 mıllıard teńgege jýyq nesıege qol jetkizgen. Aýdan ákiminiń aıtýynsha, aýdannyń agrarlyq sektorynda da ósý úrdisi baıqalady. Bilim berý, densaýlyq saqtaý jáne mádenıet salalarynda da oń kórsetkishter bar.

Kezdesýde birqatar aýdan turǵyny kókeıde júrgen máselelerin kóterdi. «Men Jýalyda kóptegen máseleler bar ekenin bilemin. Sizder óz suraqtaryńyzdy ashyq qoıa berińizder, biz olardyń sheshý joldaryn qarastyratyn bolamyz», dep Berdibek Saparbaev qatysýshylardy ashyq dıalogqa shaqyrdy. «Qazirgi ýaqytta Jýaly aýdany óz áleýetin tolyq paıdalanyp otyrǵan joq. Investısııa tartý kórsetkishi boıynsha sońǵy orynnan kórinýi sonyń dáleli. О́tken jyly kásipkerlik salasyndaǵy jobalarǵa eshqandaı suranys bolmady. Aýyl sharýashylyǵy ónimderin óndirýge qatysty kórsetkish te asa joǵary emes, ósim tek bir paıyzdy ǵana quraıdy. Aýdanda 500 kásipker tirkelse, is júzinde onyń 16-sy ǵana jumys isteýde», dedi oblys ákimi. Jýalylyqtar kótergen keıbir máselelerge Berdibek Saparbaevtyń ózi túsinikteme berdi. «Biz áleýmettik jelilerdi qadaǵalap, árbir aýdan boıynsha monıtorıng júrgizemiz. Jýaly aýdanynda densaýlyq saqtaý men bilim berý salasynda kóptegen máseleler kezdesedi. Turǵyndardyń suraqtaryna jaýaptar árdaıym ýaqytyly berile bermeıdi, sondyqtan narazylyq týyndaıdy. Sonymen qatar Prezıdentimiz Qasym-Jomart Toqaev «Halyq únine qulaq asatyn memleket» qaǵıdasyna únemi nazar aýdartyp keledi. Iаǵnı, jergilikti atqarýshy organdar halyqtyń barlyq ótinishterine der kezinde jaýap qaıtarýǵa mindetti. Aıanbaı jumys isteńizder, halyqqa memlekettik baǵdarlamalardyń múmkindikterin túsindirip, qoldaý sharalary jáne sýbsıdııalar týraly jetkizý qajet.

Eger sharýalarǵa jaıylym jetkiliksiz bolsa, bul maqsatqa orman qorynyń jerlerin tartý qajet, osylaısha egis alqaptaryn da ulǵaıtýǵa bolady. Tuqym sapasyn arttyrý, tyńaıtqyshtardy qoldaný, zamanaýı tehnologııalardy engizý jónindegi jumystardy jandandyrý mańyzdy. Búginde biz sharýalarǵa sýarmaly jerlerdiń kólemin arttyrý úshin jańbyrlatyp sýarý qondyrǵylaryn satyp alýǵa, uńǵymalar salýǵa kómektesýdemiz. Budan basqa, usaq sharýashylyqtardy irilendirýge nazar aýdarǵan abzal. Bul olarǵa aýyl sharýashylyǵy tehnıkalaryn satyp alýǵa múmkindik beredi. Adamdarǵa paıda tabatyn joldy kórsete bilgen jón. Olaı bolmaǵan jaǵdaıda aýdan ekonomıkasy tómen deńgeıde qala beredi. Biz bir kezderi búkil Odaqqa tanymal bolǵan Jýalynyń kartop óndirisin qaıta ulǵaıtý mindetin qoıyp otyrmyz. Sondaı-aq sútti qaıta óńdeýge kóńil bólý kerek», dedi Berdibek Saparbaev.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz