Batys Qazaqstan oblysy din isteri basqarmasynyń basshysy Maqsat Ramanqulovtyń aıtýynsha, «Jýsan» operasııasy barysynda Aq Jaıyq óńirine ákelingenderdiń ishinde 32 áıel, 85 bala), 3 er adam bar eken. Balalardyń 46-sy – mektep jasynda, 38-i – mektepke deıingi jasta, bireýi – stýdent kórinedi.
Bul áıelderdiń dinı kózqarasyn anyqtaý jáne deradıkaldandyrý maqsatynda 70 dáris sabaǵy ótkizilgen. Onlaın formatynda 4 dáris uıymdastyrylǵan.
«Olarǵa teologııalyq sabaqtar, jeke kezdesýler, «onlaın» sabaqtar uıymdastyryp, murajaılarǵa, tabıǵat aıasyna birge shyqtyq. Kınoterapııa, ashyq konkýrstar júrgizý arqyly qazaqstandyq qoǵamnyń qundylyqtaryna baýlydyq. Osyndaı 17 is-shara uıymdastyryldy» deıdi Maqsat Ramanqulov.
Basqarma basshysynyń aıtýynsha, jasalǵan jumystardyń nátıjesi bar, atalǵan sanattaǵy áıelderdiń kózqarastarynda radıkaldy ıdeologııanyń belgileri baıqalmaıdy. Olardyń basym kópshiligi qazaqstandyq qoǵam qundylyqtaryna beıimdelgen.
Jalpy sońǵy bir jyl ishinde óńirde destrýktıvti dinı ıdeologııanyń aldyn alý jáne qaýipti dinı aǵymdardyń jaqtastaryn ońaltý baǵytynda mamandar 778 adamdy qamtyp, 1246 jeke kezdesý ótkizgen eken. «Ońaltý jumystarynyń nátıjesinde 30 er, 19 áıel adam dástúrli dinge aýysty, 82 adam elimizdiń qoǵamdyq qundylyqtaryna beıimdeldi, 32 adam kezdesýden bas tartty, al 11 adam dinnen múldem alystap ketken», delingen Batys Qazaqstan oblysy din isteri basqarmasy taratqan baspasóz habarlamasynda.
2020 jyl ishinde oblysta dinı qarym-qatynas salasy boıynsha 23 ákimshilik quqyq buzýshylyq deregi tirkelgen eken. Bul 2019 jylmen salystyrǵanda 4 oqıǵaǵa kóp. Zań buzǵan azamattarǵa tıisti qujattar toltyrylyp, sot qaýlysymen aıyppul salynǵan.
«Jalpy oblys aýmaǵynda dinı ahýal turaqty. О́ńirde túrli etnostar men konfessııalar ókilderi beıbıtshilik pen birlikte ómir súrýde», deıdi Batys Qazaqstan oblysy din isteri basqarmasynyń basshysy Maqsat Ramanqulov.
Batys Qazaqstan
