Shymkent qalasynda Qonaev dańǵyly jalǵasynyń qurylysy júrgizilýde. Atalǵan nysan jalpy 18,1 shaqyrym 7 ýchaskeden turady. Jalpy quny – 36 mlrd.teńge. Shymkent qalasynyń ákimi Murat Áıtenov qurylys nysanynyń II III V kezeńderi boıynsha júrgizilip jatqan jumys barysyn pysyqtady.
Qurylystyń 2 - kezeńi boıynsha 2021 jylǵa 5,3 mlrd teńge qaralyp, búgingi tańda memlekettik satyp alý konkýrsy ótkizilýde. Nysannyń jalpy quny – 5,4 mlrd teńge, uzyndyǵy – 1,7 shaqyrym.
Qurylys kezeńderin bastan-aıaq jaıaý júrip, aralaǵan shahar basshysy jaýapty azamattarǵa birqatar tapsyrmalar júktedi.
– Bul – óte mańyzdy joba. Jumys ta aýqymdy. Endi jer telimderin tezirek memleket muqtajdyǵyna qaıtaryp, iri tehnıkalardyń jumys isteýine múmkindik jasaý kerek. Qurylystyń qarqyndy júrýi úshin ár eki aptada bir ret jumys barysyn osylaı pysyqtap otyramyn. Strategııalyq mańyzdy nysanda jumys qarqynyn kúsheıtip, bir kún de joǵaltpaýymyz kerek, - dedi qala ákimi.
Sondaı-aq, Murat Dúısenbekuly qalalyq jolaýshylar kóligi jáne avtomobıl joldary basqarmasynyń basshysyna jumysty jedeldetý amaldaryn oılastyryp, bul baǵytta barlyq qolaıly jaǵdaı jasaýdy mindettedi.
Ekinshi kezeńde memlekettik muqtajdyqqa 89 ýchaskeni alý qajet. Onyń ishinde, búginde 16-y qaıtaryldy. 41 nysan boıynsha menshik ıelerine ótemaqy usynylýda, 32 nysan baǵalanýda (shamamen 1,7 mlrd.teńge).
Aıta ketsek, Qonaev dańǵyly jalǵasynyń qurylysy boıynsha 2021 jylǵa 10,3 mlrd teńge qarastyrylǵan. Atalǵan kezeńderde 360 ýchaskeni memlekettik muqtajdyqqa alý qajettiligi týyndaýda.
