Densaýlyǵyndaǵy kináratqa qaramastan el qatarly eńbek etip, perzentin de ósirip, barlyq aýyrtpalyqty názik ıyǵymen kóterip júrgen Marjanaıdyń jaǵdaıyna alańdaǵan synyptastary baspana máselesin sheshýdiń joldaryn izdedi. О́ıtkeni Alǵada páterden páterge kóship júrgen jalǵyzbasty múgedek ananyń basyndaǵy qıyndyqty onyń jaqyn joldastarynan basqa eshkim bilmedi. Qansha júgirse de, jalǵyzbasty, múgedek anaǵa óz kúshimen baspana satyp alýǵa múmkindigi joq ekenin túsingen joldastary kóptiń kómegine júginýdi jón kórgen. Olar Alǵa qalalyq meshitiniń bas ımamyna baryp, qaıyrymdylyq sharalary arqyly baspana máselesin sheship berýdi ótingen.
«Marjanaı kórgen qıyndyǵyn jaqyndaryna da, joldastaryna da aıtyp shaǵynbasa da, sońǵy ýaqytta ishteı qatty kúızeliske túsip júrgenin sezetinbiz. Jalǵyz balasyn qatarynan kem qylmaı ósirip, jaqsy tárbıe berip otyrǵan qurbymyzdy qıyn sátte qoldaýdy jón kórdik. Biz de jas emespiz, árqaısymyzdyń otbasymyz, bala-shaǵamyz bar, kópshiligimiz pandemııanyń kezinde jumyssyz qaldyq. Desek te, osy isti bastaǵan soń aıaqsyz qaldyrmaıyq degen nıetpen aýdandyq meshitke baryp kómek suradyq», deıdi Alǵa qalasynyń turǵyny Rýslan Tájiǵulov.
QMDB qarasty «Zeket» qorynyń elimiz boıynsha bergen 346-shy baspanasy osylaısha Alǵa qalasynyń turǵyny, III toptaǵy múgedek Marjanaı Túıeshınaǵa buıyrdy. Aıta ketý kerek, osyǵan deıin de «Zeket» qory kóp balaly otbasylarǵa, ata-anasyz qalǵan jasóspirimderge, múgedek bala tárbıelep otyrǵan Aqtóbe oblysynyń turǵyndaryna 13 baspana kiltin tabystaǵan edi. Marjanaı Túıeshınaǵa páter kiltin Aqtóbe oblysynyń bas ımamy Tólebı Ospan tapsyryp, Alǵa aýdanynyń ákimi Mamyrǵalı Aqqaǵazov syılyqtarymen keldi. Muqtaj otbasylarǵa qýanysh syılap júrgen «El úlesi – páterge» jobasy aldaǵy ýaqytta da jalǵasa beredi.
Aqtóbe oblysy,
Alǵa aýdany
