Sportshylar tilinde klassıkalyq planka ustaý dep atalatyn sporttyń bul túri boıynsha 16 jasqa deıingi jasóspirimder arasyndaǵy eń joǵarǵy álemdik kórsetkish buǵan deıin 1 saǵat 2 sekýnd bolǵan eken. Mustafa «Kostanay Plaza» saýda ortalyǵynda jınalǵan kópshilik kórermenniń kóz aldynda 1 saǵat 2 mınýt 7 sekýndqa deıin qos shyntaqpen tórttaǵandap turyp, álem rekordyn 2 mınýtqa uzartty.
Jas rekordshynyń jattyqtyrýshysy – óz ákesi Marat Qaıypbaev.
- Ulym buǵan deıin fýtbolmen aınalysty. Negizi búgingi kórsetkishti úıde birneshe ret qaıtalaǵan. Mustafadan basqa 3 balam bar, olar da osy sport túrimen aınalysady. Úıde bárimiz birge jattyǵamyz. О́zim klassıkalyq plankany 8 mınýtqa deıin ustap tura alamyn. Ulymnyń kórsetkishine jetý qıyn, árıne, - dedi M.Qaıypbaev.
Jas sportshynyń jetistigin kózben kórý úshin Qostanaıǵa Qazaqstan rekordtar kitabynyń rekordtar tirkeý departamentiniń dırektory Baqytjan Tastúlekov te kelgen.
- Qazaqstanda kúsh rekordary jıi jańarady, áýesqoı sportshylar pandemııaǵa qaramastan iri nátıjelerge qol jetkizip, jurtty qaıran qaldyrýda. Mysaly, almatylyq rekordshy ótken qańtar aıynda ǵana 26 tonnalyq vagondy tisimen tartyp qozǵaltyp, álem jurtshylyǵyna bas shaıqatty. Qazir 700 bettik kitapta 5 myńǵa jýyq rekordshy tirkelgen. Eger Mustafanyń kórsetkishin kúzge deıin eshkim jańarta almasa, Mustafanyń esimi áýesqoı sport túri boıynsha eń joǵarǵy álemdik kórsetkishti jańartqan rekordshy retinde Qazaqstan rekordtar kitabyna enedi, - dedi B.Tastúlekov.
Qostanaı oblysy
